O‘zbekistonda tadbirkorlar birlashmalariga majburiy a'zolik joriy etilishi mumkin

O‘zbekiston Respublikasi Oliy Majlisi Qonunchilik palatasining 2018 yil 12 iyun kuni bo‘lib o‘tgan navbatdagi majlisida deputatlar kun tartibiga kiritilgan bir qator qonun loyihalarini ko‘rib chiqdilar. Qonun loyihalari dastavval siyosiy partiyalar fraksiyalarining, O‘zbekiston Ekologik harakati deputatlar guruhining, qo‘mitalar va ular huzurida faoliyat ko‘rsatayotgan ekspert guruhlarining majlislarida muhokama qilindi, deb xabar bermoqda O‘zbekiston Respublikasi Oliy Majlisi Qonunchilik palatasining axborot xizmati.

Deputatlar tomonidan ikkinchi o‘qishda ko‘rib chiqilgan «Ekstremizmga qarshi kurashish to‘g‘risida»gi qonun loyihasi joriy yilning may oyida bo‘lib o‘tgan majlis jarayonida muhokama qilingan va kontseptual jihatdan ma'qullangan edi.

Qonun loyihasini ikkinchi o‘qishga tayyorlash chog‘ida parlament quyi palatasining Mudofaa va xavfsizlik masalalari qo‘mitasi a'zolari tomonidan joylarda ushbu soha mutaxassislari, olimlari ishtirokida 10 ga yaqin kengaytirilgan yig‘ilishlar tashkil etildi. Muhokamalar yakunlariga ko‘ra to‘plangan barcha takliflar umumlashtirildi va tahlil qilib chiqildi. Shuningdek qonun loyihasi jamoatchilik muhokamasi doirasida Qonunchilik palatasining rasmiy veb-saytiga joylashtirildi. Umuman olganda, fuqarolarning 50 dan ziyod takliflari o‘rganilib, ulardan eng dolzarblari qonun loyihasini maromiga yetkazishda hisobga olindi.

Ushbu qonun loyihasining qabul qilinishi shaxs, jamiyat va davlatning xavfsizligini ta'minlash, davlatning konstitutsiyaviy tuzumini va hududiy yaxlitligini himoya qilish, fuqarolar tinchligini, millatlararo hamda konfessiyalararo totuvlikni saqlash, ekstremizm sohasidagi huquqbuzarliklarning o‘z vaqtida oldini olish, aniqlash va ularga chek qo‘yish, ularning oqibatlarini bartaraf etish, shuningdek javobgarlikning muqarrarligi prinsipini ta'minlash imkonini berishi deputatlar tomonidan qayd etib o‘tildi.  

«O‘zbekiston Respublikasi Savdo-sanoat palatasi to‘g‘risida»gi O‘zbekiston Respublikasi Qonuniga o‘zgartish va qo‘shimchalar kiritish haqida»gi qonun loyihasini ikkinchi o‘qishda ko‘rib chiqish davomida ta'kidlandiki, Sanoat, qurilish va savdo masalalari qo‘mitasi deputatlari tomonidan xorijiy mamlakatlarning ushbu sohadagi tajribasini o‘rganishga e'tibor qaratildi. Chunonchi, tadbirkorlar birlashmalariga majburiy a'zolikning kiritilishi biznes hamjamiyatini o‘zaro uyg‘unlashtiradi va iqtisodiyotning umuman rivojlanishiga ijobiy ta'sir etadi. Qonun loyihasi tadbirkorlik sub'yektlarining huquqlari va qonuniy manfaatlarini himoya qilish sohasidagi normativ-huquqiy bazani biznes hamjamiyatini institutsional rivojlantirish orqali takomillashtirishga qaratilgan.

So‘ngra deputatlar mamlakatda nizolarni mustaqil shaxslar – mediatorlar ishtirokida hal etishning muqobil usullarini rivojlantirish, sudlar zimmasidagi yukni kamaytirish uchun huquqiy shart-sharoitlar yaratish maqsadida ishlab chiqilgan «Mediatsiya to‘g‘risida»gi qonun loyihasini ikkinchi o‘qishda muhokama qildilar.

Ijtimoiy ahamiyati hisobga olingan holda ushbu qonun loyihasi Qonunchilik palatasining www.parliament.gov.uz. rasmiy veb-saytiga, shuningdek deputatlarning ijtimoiy tarmoqlardagi shaxsiy sahifalariga joylashtirilgan bo‘lib, bu saylovchi-obunachilarning fikr-mulohazalari va takliflarini inobatga olish imkonini berdi. Kelib tushgan ko‘pgina takliflar qonun loyihasini ikkinchi o‘qishga tayyorlashda hisobga olindi.

Nizolarni hal etishda mediatsiyani qo‘llash vaqtni tejash hamda fuqarolar, tashkilotlarning, shu jumladan tadbirkorlik sub'yektlarining sud xarajatlarini qisqartirish imkonini beradi, nizolarning sudga qadar hal etilishini amalga oshirishning samarali tashkiliy-huquqiy mexanizmlarini yaratadi.

Majlisda O‘zbekiston Respublikasi prezidentining «Umumiy o‘rta, o‘rta maxsus va kasb-hunar ta'limi tizimini tubdan takomillashtirish chora-tadbirlari to‘g‘risida»gi  farmoniga hamda O‘zbekiston Respublikasi prezidentining «O‘zbekiston Respublikasi Oliy va o‘rta maxsus ta'lim vazirligining O‘rta maxsus, kasb-hunar ta'limi markazi faoliyatini takomillashtirish to‘g‘risida»gi  Qaroriga muvofiq ishlab chiqilgan «O‘zbekiston Respublikasining ayrim qonun hujjatlariga o‘zgartishlar kiritish to‘g‘risida»gi qonun loyihasi birinchi o‘qishda ko‘rib chiqildi.

Deputatlar shuningdek «O‘zbekiston Respublikasining Ma'muriy javobgarlik to‘g‘risidagi kodeksiga o‘zgartish va qo‘shimchalar kiritish haqida»gi qonun loyihasini birinchi o‘qishda ko‘rib chiqdilar.

O‘zbekiston Respublikasi prezidentining 2017 yil 4 mayda qabul qilingan «2017–2021 yillarda yer osti suvlari zaxiralaridan oqilona foydalanishni nazorat qilish va hisobga olishni tartibga solish chora-tadbirlari to‘g‘risida»gi qarori ijrosini ta'minlash  maqsadida yuridik va jismoniy shaxslarning yer osti suvlaridan ruxsatsiz suv olish uchun  javobgarligi kuchaytirilmoqda.

Eslatib o‘tamiz, ushbu yilning 29 may kuni O‘zbekiston Respublikasi prezidenti Shavkat Mirziyoyev raisligida import va eksport qilish, mahalliy byudjyetlarga qo‘shimcha tushumlarni ta'minlash masalalariga, shuningdek g‘allani yig‘ib-terish, takroriy ekinlarni yetishtirish hamda suvdan oqilona foydalanish  bo‘yicha muhim tadbirlarni o‘tkazish bilan bog‘liq dolzarb vazifalarga bag‘ishlangan videoselektor majlisi bo‘lib o‘tdi.

Deputatlar belgilangan vazifalarni hisobga olgan holda joylardagi ishlarning aniq holatini o‘rganib chiqdilar, ishlar yakunlari yer osti suvlaridan ruxsatsiz suv olish uchun ma'muriy javobgarlikning kuchaytirilishini nazarda tutuvchi qonun loyihasida inobatga olindi.

Qonun loyihasining qabul qilinishi suv resurslaridan oqilona va tejab foydalanishga ko‘maklashadi.

Parlament a'zolari Qonunchilik palatasining vakolatlariga taalluqli boshqa masalalarni ham muhokama qildilar.