Аргентинада Сампаоли ва футболчилар ўртасидаги можаро тафсилотлари ошкор қилинди

Аргентиналик журналист ва шарҳловчи Ариэль Сеносян «Мундиал ҳикоялари» номли китобида собиқ бош мураббий Хорхе Сампаоли ва футболчилар ўртасида юзага келган можаро тафсилотларини ёзди.

Хусусан, журналист ЖЧ-2018 гуруҳ босқичидан ўрин олган Хорватияга (0:3) қарши ўйиндан сўнг, кийиниш хонасида юз берган воқеани ошкор қилди.

Футболчилар мураббий ва унинг ёрдамчиларини ўраб олиб, унга эътироз билдира бошлашган. Уларнинг номидан Хавьер Маскерано ва Лионель Месси гапирган.

– Биздан нимани истайсан, тушунмаяпмиз. Энди сенга ишонмаймиз ва ўз фикримизга эга бўлишни истаймиз, — деди футболчилар.

– Нима ҳақидаги фикр? — жавоб берди Сампаоли.

– Ҳамма нарса ҳақидаги.

– Демак, энди таркибни ўзларингиз танлайсизлар, машғулот режасини тузасизлар ва бошқа ишларни қиласизлар, шундайми?

– Сен мендан асосий таркибда кимни тушириш ҳақида ўн марталаб сўрагансан, аммо бирор исмни айтмаганман. Ҳамманинг олдида жавоб бер, сенга бирор исмни айтдимми? — деди Лионель Месси.

Шундан сўнг, кийиниш хонасида бўлган Аргентина футбол уюшмаси президенти Клаудио Тапиа Сампаолига: «Тан олишинг ва таслим бўлишинг керак» - деган.

Эслатиб ўтамиз, Аргентина терма жамоаси жаҳон чемпионати 1/8 финалигача етиб бориб, Францияга 3:4 ҳисобида ютқазган, мусобақадан сўнг, Хорхе Сампаоли лавозимини тарк этган эди.