Олий ва ўрта махсус таълим вазири: тест синовлари олий таълим муассасаси иштирокисиз ўтказилади

Бу йилги тест синовлари олий таълим муассасаси иштирокисиз ўтказилади. Бу ҳақда Халқаро пресс-клубда кеча, 21 июль куни бўлиб ўтган «Қабул-2018: Шаффофлик, ҳалоллик, адолат мезонлари ва инновацион ёндашувлар» мавзуидаги сессияда Ўзбекистон олий ва ўрта махсус таълим вазири Иномжон Мажидов маълум қилди.

«Бу йилги тест синовлари олий таълим муассасасидан олиб чиқиб кетилди. Тест синовлари олий таълим муассасаси ичида бўлмайди. Олий таълим муассасаси маъмурияти ва педагоглар жамоаси тест синовларида иштирок этмайди. Катта павильонларда, катта ёпиқ майдонларда тест олиш шароитлари яратилган», деди вазир.