Тўртинчи марта сайланган Лула ва сўровномаларда ортда қолаётган Нетаняҳу – кун дайжести

ТИВ вакилининг таъкидлашича, Шри-Ланка халқаро ҳуқуқ ва инсонпарварлик нуқтаи назаридан шошилинч тиббий ҳолатларда ёрдам беришга мажбур. «Бу биз ўша кемаларга ёрдам берамиз дегани эмас», деди ТИВ расмийси.

Шри-Ланка можарода бетараф эканини таъкидлаб келади. AP’нинг ёзишича, октябр ойида мамлакат расмийлари озиқ-овқат, сув ва ёқилғи етишмаётганини маълум қилган Эрон кемаларига ҳозирча ёрдам юбориш режаси йўқлигини айтганди.

Нетаняҳу сўровномаларда ортда қолмоқда

Исроилда 27 октябр куни парламент сайлови бўлиб ўтади. 2023 йил 7 октябрдаги ҳужумдан кейинги илк сайлов натижаси – Исроил бош вазири Бинямин Нетаняҳунинг сиёсий тақдирини ҳал қилиши мумкин.

Мамлакатнинг учта асосий телеканали 23 октябр куни сўнгги сўровномаларни эълон қилди. Уларда Исроил армиясининг собиқ бош штаб бошлиғи Гади Айзенкот бошчилигидаги «Яшар» партияси 22–23 ўрин билан олдинда. Нетаняҳунинг «Ликуд» партияси эса 19–21 ўрин билан иккинчи ўринда. Бош вазирликка ким муносиброқ деган саволда ҳам Айзенкот Нетаняҳудан олдинда.

Сўровларга кўра, Нетаняҳунинг ўнг ва ортодокс партиялардан иборат блоки 50 ўрин, мухолифат эса 52–56 ўрин олиши мумкин. Бироқ 120 ўринли Кнессетда ҳукумат тузиш учун зарур бўлган 61 ўринни ҳеч бир томон тўплай олмаяпти. 14–16 ўрин олиши кутилаётган араб партияларини эса ҳеч бир блок ўз сафида ҳисобламайди.

Reuters’нинг ёзишича, Нетаняҳунинг анъанавий тарафдорлари орасида ҳам кайфият ўзгармоқда. Узоқ йиллардан бери «Ликуд» таянчи бўлиб келган Димона шаҳрида айрим сайловчилар уйма-уй юриб, Айзенкот учун ташвиқот қилмоқда.

«Биз ўзгаришга муҳтожмиз. Биби кетиши керак», деган умрининг кўп қисмида «Ликуд»ни қўллаб-қувватлаган сайловчи.

Нетаняҳу 30 йил олдин Исроилнинг энг ёш бош вазири бўлганди. Ҳозир 77 ёшли сиёсатчи олти муддат давомида жами 18 йил ҳукумат бошқариб, мамлакатдаги энг узоқ ишлаган бош вазирга айланган.

Макка пакти давлатлари Эрон билан учрашади

Ҳусийларнинг Саудия Арабистонига ҳужумлари кучайиб бораётган бир пайтда Макка пакти давлатлари Эрон билан тўғридан тўғри мулоқотга киришмоқда. Reuters’нинг икки манбага таяниб ёзишича, 26 октябр куни Саудия Арабистони, Туркия ва Покистоннинг юқори мартабали вакиллари Теҳронда эронлик расмийлар билан учрашади.

Манбаларга кўра, учрашувда Саудия мудофаа вазири, шаҳзода Холид ибн Салмон ва Покистон армияси қўмондони фелдмаршал Осим Мунир қатнашади. Туркиядан эса мамлакат разведка хизмати раҳбари боради.

Туркия, Покистон ва Саудия Арабистони август ойида Макка мудофаа келишувини имзолаганди. Покистон ўтган ҳафтада пактни маъқуллади, Туркия парламентида эса уни ратификация қилиш жараёни давом этмоқда.

Агентлик ёзишича, бу Саудия ҳусийлар ҳужумига учраганидан бери Эрон ва учала давлат ўртасидаги илк юқори даражадаги мулоқот бўлади.

Шу орада ҳужумлар ҳам тўхтамаяпти. 26 октябр тонгида ҳусийлар Ар-Риёдга баллистик ракета учирди. Ракетани Саудия ҳаво ҳужумидан мудофаа кучлари уриб туширди. Саудия Арабистони бошчилигидаги коалиция эса жавоб тариқасида Санода иккита баллистик ракета учириш қурилмаси йўқ қилинганини билдирди.

Ҳусийлар ҳафта охирида ҳам Саудиянинг жанубий ва ғарбий ҳудудларига ўнлаб ракета ва дрон учирди. Шанба куни уриб туширилган ракета парчалари Маккадаги «Масжидул Ҳаром»дан 20 километрча нарига тушди. Якшанба куни эса парчалардан икки киши жароҳатланди.

Муқаддас шаҳарлар томон учирилаётган ракеталар у ердаги масжидлар хавфсизлиги борасидаги хавотирларни кучайтирмоқда. «Масжидул Ҳаром» ва «Масжидун Набавий» диний ишлар раиси шайх Абдураҳмон ас-Судайс ҳусийларнинг Макка ва Мадина ҳудудларига зарбаларини қоралади. У икки муқаддас масжид хавфсизлигини «бузилмаслиги керак бўлган қизил чизиқ» деб атади.

Ар-Риёддаги Қирол Холид номидаги халқаро аэропорт эса 10 октябрдаги ҳужумдан сўнг якшанба куни қисман қайта ишга туширилди.

Сербияда талабалар ғалабаси

Сербияда 25 октябр куни бўлиб ўтган навбатдан ташқари парламент сайловида талабалар ҳаракати тузган рўйхат ғалаба қозонди. Мамлакатни 14 йилдан бери бошқариб келаётган Александр Вучич мағлубиятни тан олди.

BBC'нинг ёзишича, «Талабалар рўйхати – Талабалар ғолиб» ҳаракатидан камида 135 номзод 250 ўринли парламентга сайланган. Номзодлар орасида талабаларнинг ўзи йўқ, рўйхат профессорлар, актёрлар ва собиқ спортчилардан тузилган.

Белград, Нови-Сад ва Ниш шаҳарларида тарафдорлар ғалабани нишонламоқда. Вучич эса мағлубиятни тан олар экан, талабаларни «Европа давлатлари ва Америка қўллаб-қувватлаганини» даъво қилди.

Александр Вучич жорий йил сентябр ойида президентликдан истеъфога чиққанди. У учинчи муддатга номзодини қўя олмагани учун партияси билан парламент сайловида қатнашиб, Сербия бош вазири лавозимини эгаллашни режа қилган.

«Талабалар рўйхати» ҳаракати эса яқинда пайдо бўлган. У 2024 йил 1 ноябрда Нови-Сад вокзалининг бетон айвони қулаб, 16 киши ҳалок бўлганидан кейин бошланган норозиликлар фонида шакллантирилди. Ўша фожиа Сербиядаги коррупция рамзига айланганди.