Европарламентнинг Латвиядан депутати Мирослав Митрофанов Латвия сейми депутати Александр Кирштейнснинг Россияни бир неча қисмларга этник принцип бўйича «парчалаб ташлаш» ҳақидаги сўзларига ўз муносабатини билдирди. Бу ҳақда RT хабар қилмоқда.
Митрофановнинг сўзларига кўра, Кирштейнс Латвия парламентидаги энг радикал миллатчилардан бири, аммо «унинг тилида бор бўлган нарса, бошқаларнинг хаёлидадир». Унинг фикрича, Латвияда, СССР парчаланиб кетганидан сўнг, кўплар Россия ҳам бир нечта қисмга ажралиб кетади, деб ишонган.
«У нафақат Латвия ва Болтиқбўйи мамлакатлари, балки 1991 йил синдроми тинчлик бермаётган Европанинг турли мамлакатларидаги жуда кўп сиёсатчиларнинг яширин истакларини ошкора ифода этди», - дейди Митрофанов.
Митрофановнинг фикрича, Кирштейнсни «уруш ва тинчлик масаласи» эмас, балки иқтисодий рақибларни - Россия ва Беларусни йўқотиш қизиқтиради. Шарқий Европадаги кўпчилик, дейди у, Россия билан «Украинада кузатилган ишларни қилиш истагида».
«Кирштейнсга ўхшаш каби одамлар дунёни янги тақсимлашдан умид қилишади, бундай ҳолатда Россиянинг парчаланиши бойликни қайта тақсимлашга олиб келади», - дея маълум қилди Митрофанов.
Эслатиб ўтамиз, аввалроқ Латвияда Россияни бир неча қисмга «парчалаб ташлаш» таклиф қилинганди.
