Toyota компанияси Японияда янгиланган Land Cruiser 300 моделини тақдим этди. Маҳаллий бозорда сотувлар 1 октябрдан бошланади. Нархлар 6 300 800 дан 10 200 300 иенагача (477 млн - 772 млн сўм) оралиқда ўзгариб туради.
Асосий техник янгилик — гибрид қурилма. Автомобил электромотор ва ўн поғонали «автомат» билан бирлаштирилган 3,5 литрли бензинли V6 двигатели билан жиҳозланган. Худди шундай агрегатлардан премиум Lexus LX 700h ҳам фойдаланади.
Умумий қуввати — 457 от кучи ва 790 Н·м айланма лаҳза. Бу вазни 170 кг га ошган Land Cruiser 300 учун рекорд кўрсаткичдир. Компаниянинг таъкидлашича, автомобил чуқурлиги 700 мм гача бўлган кечувлардан ўта олади.
3,5 литрли V6 двигателли бензинли Land Cruiser 300 ишлаб чиқаришдан олиб ташланди. Шундай қилиб, модел учун ички ёнув двигателларидан энди фақат 307 от кучига эга 3,3 литрли дизел таклиф этилади.
Гибрид Японияда иккита кўринишда тақдим этилади — ZX ва GR Sport. Шунингдек, автомобил учун Modellista тюнинг-ательесидан махсус пакет тайёрланган бўлиб, у машинани спорт бамперлари, спойлер, кенгайтирилган қанотлар ва ён поғоналар билан безатади.
