«Тарихий даҳшатли кун». Трамп билан ҳам «Уотергейт» можароси юз берадими?

АҚШнинг собиқ адвокати Майкл Коэн судда ўз айбини тан олгани туфайли Қўшма Штатларда собиқ етакчи Ричард Никсонга импичмент эълон қилинган пайтдан бери энг қоронғу кунлардан бири келди. Бу ҳақда NBC телеканали маълум қилган.

21 август куни Коэн Трамп 2016 йилги президентлик сайловларида ғалаба қозониш учун ёрдам бериш мақсадида сукут сақлаш учун ноқонуний пул тўлашни ўз ичига олган жиноятлар бўйича ўзини айбдор деб тан олди. Энг асосийси, дея таъкидлайди NBC, Коэн буни Трампнинг кўрсатмаси билан қилганини айтган. Хусусан, Коэн АҚШдаги сайлов кампаниясида Трамп билан муносабатлари ҳақида маълумотлар ошкор қилишни режалаштирган аёлларга сукут сақлаши учун пул тўлаган.

Коэннинг кўрсатмалари Трамп учун ҳам ҳуқуқий, ҳам сиёсий жиҳатдан шу даражада зарар етказдики, ҳатто унинг адвокати Рудольф Жулиани фақат АҚШ президентига қарши айблов хулосаси йўқлигини билдиришдан бошқа иложи қолмади, дейилади материалда.

«Коэнга қарши ҳукумат томонидан қўйилган айбловларда президентга қонунбузарликлар ҳақида ҳеч қандай даъво йўқ», - деди Жулиани.

Коэннинг баёноти, аввалроқ ўз сайловолди ваъдасига мувофиқ Вашингтондаги коррупцияни «ботқоғини бутунлай қуритиш» мақсадида ўзининг иттифоқчилари билан бирга келган Трампга сўнгги зарба бўлмади.

Трамп сайловолди штабининг собиқ раҳбари Пол Манафорт молия ва солиқ фирибгарлиги бўйича саккизта бандда айбдор деб топилди, Трампнинг тарафдори бўлган америкалик конгрессмен Дункан Хантерга эса, Трамп кампаниясини молиялаштириш тўғрисидаги қонунни бузганлик бўйича айблов қўйилди.

Бу айбловлар шундан дарак берадики, АҚШ президенти Дональд Трамп нафақат жиноий фаолият ҳақида билган, балки унга раҳбарлик ҳам қилган. Бу эса Қўшма Штатларни Никсон даврига қайтаради.

1998 йилда АҚШ президенти Билл Клинтон Оқ уй ходимаси Моника Левински билан алоқалари туфайли келиб чиққан можародан сўнг, ёлғон гувоҳлик бериш ҳамда адлия органлари ишига тўсиқлар яратиш бўйича айбланиб жавобгарликка тортилганди. Бироқ, Трампдан фарқли ўлароқ Клинтон жиддий жиноятларда айбланмаган.

Буларнинг барчаси АҚШда бўлиб ўтиши режалаштирилган оралиқ сайловлардан уч ой аввал кузатилмоқда. Бу сайловларда Республикачилар партияси АҚШ сенатидаги ўз позицияси ва вакиллар палатасидаги кўпчилик ўринни сақлаб олишга уринади.

Трамп учун бу шунчаки қийин кун эмас, бу АҚШ президентлиги учун «тарихий даҳшатли кун» бўлди, дея хулоса қилган NBC.