Пентагон бош инспекторининг АҚШ Конгрессига тақдим этган ҳисоботида Эрондаги уруш Америка қуролли кучларининг стратегик ўқ-дори захираларига сезиларли таъсир кўрсатгани қайд этилди.
Ҳужжат 28 февралдан 30 июнгача бўлган даврни қамраб олади. Унга кўра, Epic Fury операциясининг шу даврдаги умумий қиймати 33,4 млрд долларни ташкил этган. Бу маблағнинг 22,3 млрд доллари ишлатилган ўқ-дори ва қурол-яроғга сарфланган.
Ҳисоботда катта ҳажмдаги ўқ-дори сарфи стратегик захираларда тақчиллик юзага келтиргани ва уларни тўлдириш бўйича АҚШ мудофаа саноати имкониятларидаги чекловларни кўрсатиб бергани айтилган.
Пентагон танқисликни юмшатиш учун харид ва ишлаб чиқариш жараёнларини тезлаштириш, муҳим материаллар, бутловчи қисмлар ва айрим турдаги ўқ-дорилар захирасини кўпайтириш устида ишлаётганини билдирган. Бироқ ишлаб чиқариш қувватларини кенгайтириш учун анча вақт талаб этилиши қайд этилган.
Ҳисоботда АҚШнинг ҳарбий йўқотишлари ҳақида ҳам маълумот берилган. Жумладан, тўртта F-15 қирувчи самолёти йўқотилган, битта F-35 шикастланган. Шунингдек, еттита KC-135 ёнилғи қуювчи самолётига зарар етган ва 30 тагача MQ-9 Reaper учувчисиз аппарати йўқотилган.
Ҳужжатда 28 феврал–30 июн оралиғида етти нафар америкалик ҳарбий хизматчи жанг ҳаракатларида ҳалок бўлгани ва 417 нафари яралангани ҳам кўрсатилган.
Эрон зарбалари натижасида Яқин Шарқдаги АҚШ ҳарбий базаларида юзлаб бино ва иншоотлар шикастланган ёки вайрон бўлган. АҚШнинг Ироқ, Кувайт, Саудия Арабистони ва БААдаги дипломатик объектларига етказилган моддий зарар қарийб 184 млн долларга баҳоланган.
Айни пайтда АҚШ маъмурияти қурол-яроғ захиралари билан боғлиқ хавотирларга бошқача баҳо бериб келмоқда. Президент Доналд Трамп аввалроқ АҚШда етарли миқдорда қурол-яроғ мавжудлигини таъкидлаган.
Ўқ-дори захираларининг қисқариши АҚШдан ҳарбий маҳсулотлар оладиган ҳамкорлар учун ҳам аҳамиятли бўлиши мумкин. Хусусан, Украина Patriot тизимлари учун ракеталарга эҳтиёж билдириб келмоқда, Тайван эса АҚШдан қурол харид қилиш бўйича шартномаларга эга.
