АҚШ Россияга Ил-20 бўйича ёрдам таклиф қилди

АҚШ ҳарбий-денгиз кучлари 6-флоти матбуот хизмати вакили Кайле Рейнснинг маълум қилишича, Қўшма Штатлар Россияга Ил-20 самолётининг Ўрта Ер денгизига қулаган жойидаги қидирув ишларини ўтказишда ёрдам бериши мумкин. Бу ҳақда РИА «Новости» хабар қилмоқда.

Аввалроқ, Россия Мудофаа вазирлигининг расмий вакили генерал-майор Игор Конашенков Ил-20 қулаган жойда қидирув операцияси давом этаётганини маълум қилганди.

Рейнснинг таъкидлашича, АҚШ Россия самолёти қулаб тушганидан хабардор.

«Бизнинг кемалар денгизга ёрдам беришни сўраган ҳар қандай мамлакатга ёрдам тақдим этишга тайёр, бу денгизчилар масъулиятининг асосий элементи ҳисобланади», - дея қайд этиб ўтди Рейнс.

Шу билан бирга, у Россия вакиллари АҚШ ҳарбий-денгиз кучларига ёрдам сўраб мурожаат қилгани борасидаги масалага аниқлик киритмади.

Эслатиб ўтамиз, аввалроқ Путин жавоб ҳаракатлари ҳақида гапирганди.