Путин Ўзбекистонга қачон келади?

Россия президенти Владимир Путин бугун «Валдай» халқаро мунозаралар клуби ишида иштирок этади, дея маълум қилди РФ президенти матбуот котиби Дмитрий Песков. Бу ҳақда ФАН хабар бермоқда.

Песковнинг айтишича, давлат раҳбари ҳар йили «Валдай» клуби аъзолари билан учрашиб, уларнинг олдида маъруза қилади. Матбуот котибининг сўзларига кўра, бу йил «модаллик бошқача бўлади». Унинг аниқлик киритишича, «президентнинг шунга ўхшаш кириш нутқи кутилмаяпти».

Кремль вакилининг қўшимча қилишича, Путин билан суҳбат икки қисмдан иборат бўлади. Иккинчи қисмда президент мунозаралар клуби иштирокчиларининг саволларига жавоб беради. Песковнинг сўзларига кўра, учрашув «қизиқарли бўлади». Кейин Россия раҳбари билан суҳбат норасмий шаклда давом этади.

Таъкидланишича, кечқурун Путин Ўзбекистонга жўнаб кетади.

«Эртага бутун кун Россия Федерацияси ва Ўзбекистон ўртасидаги муносабатларга бағишланади», - дея қайд этиб ўтди матбуот котиби.

Эслатиб ўтамиз, 18-19 октябрь кунлари Россия президенти Владимир Путиннинг Ўзбекистонга ташрифи амалга оширилади.