Ҳукумат қарори лойиҳаси: Нурафшон шаҳри комплекс ривожлантирилади

Норматив-ҳуқуқий ҳужжатлар лойиҳалари муҳокамаси порталида Вазирлар Маҳкамасининг “2018-2020 йилларда Тошкент вилоятининг Нурафшон шаҳрини комплекс ривожлантириш чора-тадбирлари тўғрисида”ги қарори лойиҳаси жойлаштирилди.

Ҳужжат билан қуйидагиларни ўз ичига олувчи 2018-2020 йилларда Тошкент вилоятининг Нурафшон шаҳрини комплекс ривожлантириш чора-тадбирлари дастури тасдиқланиши мумкин:

саноат, хизматлар соҳасини ривожлантириш лойиҳаларининг манзилли рўйхати;

йўл инфратузилмасини такомиллаштириш, электр-энергия, алоқа ахборотлаштириш, ичимлик ва оқова сув ҳамда табиий газ тармоқларини қуриш, реконструкция ва модернизация қилиш чора-тадбирлари;

янги уй-жойларни қуриш, иссиқлик таъминоти, ободонлаштириш ва кўкаламзорлаштириш чора-тадбирлари;

ижтимоий соҳа объектларини янгидан қуриш, реконструкция қилиш ва таъмирлаш чора-тадбирлари.

Тошкент вилояти ҳокимлиги:

манфаатдор давлат ва хўжалик бошқаруви органлари, тижорат банклари, лойиҳаларнинг ташаббускорлари билан биргаликда тасдиқланган манзилли рўйхат параметрлари сўзсиз бажарилишини таъминласин ва бунда инвестиция лойиҳаларининг ўз вақтида ва сифатли амалга оширилишини, ишлаб чиқаришнинг мўлжалланган ҳажмлари ўзлаштирилишини ва янги иш ўринлари ташкил этилишини назарда тутади;

муаммоли масалаларни мунтазам равишда кўриб чиқиб, уларни ҳал этиш юзасидан тезкор ва амалий зарур чора-тадбирларни амалга оширган ҳолда, лойиҳалар бажарилиши юзасидан тизимли мониторинг олиб боради.

Тошкент вилояти ҳокимлигига Ўзбекистон Республикаси Инвестициялар бўйича давлат қўмитаси ва хизмат кўрсатувчи тижорат банклари билан келишган ҳолда, лойиҳанинг қийматини ва иш ўринлари сонини сақлаб қолиш шарти билан лойиҳаларнинг тасдиқланган манзилли рўйхатига, заруратга кўра, қўшимча ва ўзгартиришлар киритиш ҳуқуқи берилади.

“Ўздавергеодезкадастр” қўмитаси, Қурилиш вазирлиги Тошкент вилояти ҳокимлиги билан биргаликда икки ой муддатда хатловлар натижасида аниқланган эгасиз объектлар ҳамда умумий майдони 0,7 гектар бўлган 4 та ер участкаларини ўрнатилган тартибда маҳаллий ҳокимлик ихтиёрига бериш, келгусида янги иш ўринлари яратиш шарти билан тадбиркорлик субъектларига белгиланган тартибда ажратиш ишларини ташкил этади ва натижаси бўйича Вазирлар Маҳкамасига ахборот беради.

Тошкент вилояти ҳокимлиги Қурилиш вазирлиги билан биргаликда Нурафшон шаҳар аҳолисини кўнгилли ҳордиқ чиқариш, шунингдек, сифатли озиқ-овқат ва қишлоқ хўжалиги маҳсулотлари билан таъминлаш мақсадида замонавий аттракцион ва ўйин қурилмалар билан жиҳозланган истироҳат боғи ҳамда замонавий қулайликларга эга бўлган деҳқон бозорини қуриш бўйича аниқ таклиф ишлаб чиқиб, Вазирлар Маҳкамасига киритади.