Туризм қўмитаси томонидан тайёрланган қарор лойиҳасига кўра, кичик авиация фаол туризмнинг янги йўналишига айланади.
Лойиҳада кичик авиацияни ривожлантиришга алоҳида эътибор қаратилган. Транспорт вазирлиги ҳузуридаги Фуқаро авиацияси агентлиги ушбу соҳада давлат регулятори этиб белгиланади ҳамда ҳаво кемаларини рўйхатдан ўтказиш, сертификатлаш, техник хизмат кўрсатиш, мутахассислар тайёрлаш ва парвозлар хавфсизлигини назорат қилиш бўйича қўшимча ваколатларга эга бўлади.
“Агентлик ICAO талаблари асосида сертификатланган максимал учиш оғирлиги 5700 кг гача бўлган (вертолётлар учун 2250 кг гача) ҳаво кемалари фаолиятини тартибга солувчи авиация қоидаларини ишлаб чиқади.
“Йўл харитаси”да вазни 115 кг гача бўлган аппаратларни рўйхатдан ўтказиш мажбуриятидан озод қилиш, енгил ҳаво кемалари учун «Ҳаваскорлик» тоифасини жорий этиш, “Кичик авиация” ягона интеграциялашган электрон платформасини яратиш, шунингдек кичик авиация учувчилари захирасини шакллантириш бўйича “Cadet program”ни йўлга қўйиш назарда тутилган.
Ҳудудларда фойдаланишдан чиқарилган учиш-қўниш йўлаклари (аэродромлар) ни фаол туризм мақсадида қайта ишга солиш, уларни ободонлаштириб, тадбиркорлик субъектлари ва ташаббускорларга ижарага бериш режалаштирилмоқда.
Шунингдек, фаол туризм йўналишида ўқув курслари ташкил этиш учун нотижорат ташкилотлар ва тадбиркорларга бино ва иншоотлар ижарага берилади.
