Ўзбекистон Олий Мажлиси Сенати раиси Ниғматилла Йўлдошевнинг Москвага ташрифи доирасида Сенат ва Россия Федерация кенгаши ўртасида ҳамкорлик ҳақидаги келишув имзоланди
Ўзбекистон ва Россия парламентлари олий палаталари раҳбарлари келишув имзолангандан кейин берган қўшма баёнотда ҳужжат парламентлараро ҳамкорликнинг ҳуқуқий базасини мустаҳкамлашини айтишган.
“Федерация кенгашига Олий Мажлис Сенатидан ҳамкасбларимизнинг ташриф буюриши парламентлараро ҳамкорликни мустаҳкамлашга ўзаро қатъиятни тасдиқлайди. Дўстлик ва ўзаро ҳурмат анъаналари – Россия ва Ўзбекистон муносабатлари қурилаётган пойдевордир”, деб айтган Федерация кенгаши раиси Валентина Матвиенко.
Матвиенко Россия-Ўзбекистон парламентлараро алоқалари охирги икки йилда сезиларли фаоллашганини таъкидлаб ўтган. У халқаро майдонларда қонунчилик ташаббусларини мувофиқлаштириш бўйича ишни кучайтиришни таклиф қилган. “Ўзбекистонлик ҳамкасбларимиз бошланиши учун МДҲ парламентлараро ассамблеясига кузатувчилар сифатида қўшилишига умид қилишни истардик”, деб айтган Матвиенко.
Ўз навбатида, Ниғматилла Йўлдошев икки давлат етакчилари саъй-ҳаракатлари эвазига Ўзбекистон ва Россия ўртасидаги муносабатлар стратегик шериклик ва иттифоқдошлик кўринишини олганини таъкидлаб ўтган. Унинг айтишича, Россия билан ўзаро манфаатли муносабатларни кенгайтириш Ўзбекистон учун устувор йўналиш ҳисобланади.
Йўлдошевнинг айтишича, Россия билан барча йўналишлар бўйича алоқалар даражасининг сезиларли ошгани Ўзбекистон манфаатларига жавоб беради.
“Олий Мажлис Сенати ва Федерация кенгаши ўртасидаги алоқаларни мустаҳкамлаш вазифаси муҳим йўналишлардан бири ҳисобланади. Тошкентда Россия-Ўзбекистон мулоқотига фаол динамика бериш учун ўзаро ҳамкорликни кенгайтиришга тайёрлар”, деб таъкидлаб ўтган Йўлдошев.
