DW хабарига кўра, CREA мазкур таҳлилни 25 сентябр куни эълон қилган. Россия реестрига кемалар қўшилишининг энг юқори кўрсаткичи 2025 йил декабрида қайд этилган — бир ойнинг ўзида 25 та кема рўйхатга киритилган.
Тадқиқотчилар бу ўзгаришни хорижий кемаларни ҳам рўйхатга олувчи очиқ реестрлар сиёсати қатъийлашаётгани билан изоҳламоқда. Бундай реестрлар «яширин флот» кемаларида санкция остидаги юкларни ташишга рухсат беришдан воз кечмоқда.
Барбадос ва Палау ўз реестрларидан санкцияга тушган барча кемаларни чиқарган. Панама эса уларнинг сонини 2025 йил майидаги энг юқори кўрсаткичга нисбатан қарийб учдан икки қисмга камайтирган.
Шунингдек, дунёнинг энг йирик кема реестрлари байроқ алмаштириш орқали санкцияларни четлаб ўтиш ва бошқа шунга ўхшаш амалиётларга қарши курашиш учун RISC номли умумий маълумотлар базасини ишга туширган.
CREA хулосасига кўра, бу шароитда «яширин флот» кемалари сохта байроқ остида сузиб, ушлаб қолиниш хавфини қабул қилиш ёки Россия реестрига ўтиш ўртасида танлов қилишга мажбур бўлмоқда.
Июн ойига келиб, аввал Комор ороллари ёки Гамбия байроғи остида ҳаракатланган 46 та кема Россияда рўйхатдан ўтган. Бошқа кемалар Серра-Леоне ва Экваториал Гвинея байроғига ўтган ёки тан олинган байроқсиз фаолиятини давом эттирган.
Россия реестрига қўшилган 107 та кеманинг 93 таси аввалдан санкциялар остида бўлган. Уларнинг 90 тасига нисбатан бир нечта юрисдикция доирасида чекловлар қўлланган.
Байроқ алмаштириш ва нефт ташиш
Таҳлилда қайд этилишича, дастлабки санкциялар жорий этилишидан олдин Россия нефтини ташиган кемалар кейинчалик байроғини аввалгига нисбатан уч баравар кўп алмаштира бошлаган. Уларнинг 16 таси Эрон ёки Венесуэла нефтини ҳам ташиган.
Россия байроғига ўтганидан кейин ҳам кемалар Россия ёнилғисини жаҳон бозорларига етказиб беришда давом этган. Улар ташиган 5,2 млрд евролик нефт асосан Хитойга йўналтирилган. Мисрда ва Қизил денгизда юкни бир кемадан бошқасига ўтказиш амалиётларидан ҳам фойдаланилган.
Arctic Metagaz билан боғлиқ ҳодиса
Ҳисоботда март ойида Ўрта Ер денгизида Россиянинг суюлтирилган табиий газ ташувчи Arctic Metagaz кемасида юз берган ёнғин ҳам тилга олинган. Хабарда айтилишича, Ливия, Малта ва Италия ҳодиса оқибатларини бартараф этиш билан мустақил шуғулланишга мажбур бўлган.
