Россиядан 4 йил ичидаги энг кўп миқдорда пул олиб чиқилди

2018 йилнинг илк 10 ойида Россиядан олиб чиқилган капитал 42,2 млрд долларни ташкил қилди. Бундан Россия Марказий банки маълумотлари дарак бермоқда. Бу миқдор 2017 йилнинг шу даврига нисбатан 3 марта кўпроқни ва 2014 йилдан бери энг катта кўрсаткични ташкил қилган.

Марказий банк маълумотларига кўра, капитал чиқишига иккита асосий омил: банкларнинг ташқи қарзни узиш бўйича операциялари ва иқтисодиётнинг бошқа секторларининг хорижий активларга сармояси таъсир кўрсатган.

Аввалроқ капитал чиқиши январь-сентябрь ойлари бўйича 31,9 млрд долларни ташкил қилгани маълум қилинган. Шу тариқа, Россиядан октябрда 10,3 млрд доллар олиб чиқилган.  

Банк прогнозига кўра, йил якунига кўра Россиядан олиб чиқилган капитал миқдори 66 млрд долларни ташкил қилиши мумкин. Бу эса Россияга қарши илк санкциялар киритилган 2014 йилдан кейинги энг юқори кўрсаткич бўлади. Ўшанда хорижга олиб чиқилган капитал миқдори 152 млрд долларни ташкил қилган.