Хоразмда Халқ депутатлари вилоят кенгашининг навбатдан ташқари сессияси. Кун тартибига вилоятга ҳоким тайинлаш масаласи киритилган

Урганч шаҳрида 30 ноябрь куни Халқ депутатлари Хоразм вилояти кенгашининг навбатдан ташқари сессияси очилди.

Сессияда Ўзбекистон Республикаси Президенти Шавкат Мирзиёев иштирок этмоқда.

Давлат раҳбари Хоразм вилояти иқтисодиётини ривожлантириш, аҳолининг ижтимоий шароитларини яхшилаш бўйича қатор ишлар амалга оширилаётганини қайд этди. 

Жорий йилда вилоятда 312та инвестиция лойиҳаси бажарилиб, янги корхоналар ишга туширилган. Йил якуни бўйича саноат маҳсулотлари ишлаб чиқариш ҳажми 16 фоиз, экспорт 22 фоиз ўсиши кутилмоқда. 

100та давлат ва хусусий мактабгача таълим муассасалари ташкил этилиб, болаларни боғчаларга қамраб олиш 33 фоизга етган.

Хоразм учун муҳим бўлган электр энергияси ва тоза ичимлик суви таъминотини яхшилаш бўйича ҳам муайян ишлар қилинди. 254 километр электр, 456 километр сув тармоқларида қурилиш ва реконструкция ишлари амалга оширилди.

Президент ўтган даврда яратилган иш ўринлари етарли эмаслиги, вилоятда ишсизлик сақланиб қолаётганини таъкидлади. Иқтисодиёт тармоқларини кўпайтириш, янги саноат корхоналари ташкил этиш ва мавжудларини кенгайтириш, қишлоқ хўжалиги, туризм ва тадбиркорликни ривожлантириш орқали бандлик даражасини ошириш бўйича топшириқлар берди.

Сессия кун тартибига Хоразм вилоятига ҳоким тайинлаш масаласи киритилган.

Эслатиб ўтамиз, шу йилнинг апрелида 2017 йилнинг октябридан Хоразм вилоятини бошқарган Илгизар Собиров лавозимдан олинганди. Собиров кейинроқ жиноят ишлари бўйича Чилонзор туман суди раиси лавозимида иш бошлади.

Апрель ойидан буён вилоятни Фарҳод Эрманов вақтинча ҳоким вазифасини бажарувчи сифатида бошқариб келмоқда.