ОАВ: Хитой ва АҚШнинг савдо сулҳи фақат сиёсий танаффусни англатади

АҚШ президенти Дональд Трамп ва ХХР раиси Си Цзиньпин ўртасида Аргентинадаги G20 саммитида эришилган келишув - савдо урушини тўхтатиш ва шартнома тузишга уриниб кўриш - афтидан, Тинч океанининг ҳар икки томонига иқтисодий зиён пайдо бўла бошлагач, икки етакчига сиёсий танаффус тақдим этишга қаратилган, деб ёзмоқда The New York Times газетаси.

Вақтинчалик сулҳ иккита иқтисодиёт ўртасидаги чуқур келишмовчиликларни бартараф эта олмайди ва моддий жиҳатдан эмас, балки кўпроқ сиёсий келишув саналади, дея аниқлик киритган NYT. Хитой ҳам, АҚШ ҳам уни миллий ғалаба сифатида кўрсатди, деб қўшимча қилади газета. Таъкидланишича, ўша пайтда ҳам Америка, ҳам Хитой иқтисодиётида икки томонлама сулҳ тузиш зарурати пайдо бўлган.

Хусусан, Хитойнинг қарздорлик билан қопланган иқтисодиёти мутахассислар прогнозидан секинроқ суръатда пасаймоқда. Шу билан бирга, Қўшма Штатлар иқтисодиётида ҳам заиф нуқталар пайдо бўлмоқда, савдо уруши америкалик фермерлар ҳамда айрим ишлаб чиқарувчиларга зарба берди, дейилади материалда.

Бош иқтисодий маслаҳатчи Стефен Мнучиннинг тахминича, агар Пекин ўз мажбуриятларини бажарса ва ўз иқтисодий сиёсатини ўзгартирса, Хитойга қарши барча божлар босқичма-босқич бекор қилиниши мумкин.

Аввалроқ, Буэнос-Айресдаги G20 саммитида Дональд Трамп ҳамда Си Цзиньпин янги божлар жорий этилишига тақиқ қўядиган, 90 кунлик савдо сулҳини тузишганди.

Эслатиб ўтамиз, бундан аввал Япония бош вазири Синдзо Абэ Трамп ва Си Цзиньпинни вазминликка чақирганди.

Абэ Трамп ва Си Цзиньпинга АҚШ ҳамда Хитой ўртасидаги савдо баҳслари бутун жаҳон иқтисодиёти учун жиддий таҳдид эканини маълум қилган. Япония бош вазири G20 саммитида савдо келишмовчиликларини ҳал қилишда етакчиларни конструктив ёндашувга эга бўлишга чақирди.