«Локомотив» икки легионер ва Ўзбекистоннинг уч карра чемпиони билан шартнома имзолади

Ўзбекистон чемпиони «Локомотив» уч нафар футболчини ўз сафига қўшиб олганини маълум қилди.

«Темирйўлчилар» ўтган мавсумни ОКМК таркибида ўтказган сербиялик яримҳимоячи Йован Жокич ва «Бунёдкор»нинг икки футболчиси – сербиялик ҳужумчи Филипп Райевац ва яримҳимоячи Азизбек Ҳайдаров билан шартнома имзолади.

26 ёшли Йован Жокич фаолияти давомида «Явор» (Сербия), «Атирау» ва Олмалиқнинг ОКМК клубларида ўйнаган. Унинг тенгдоши Филипп Райевац «Колубара» (Сербия), «Сиарка» (Польша), «Белград» (Сербия), «Қўқон-1912» ва «Бунёдкор» клублари шарафини ҳимоя қилган.

Ўзбекистоннинг уч карра чемпиони, тажрибали футболчи Азизбек Ҳайдаров 2004-2007 йиллар давомида «Локомотив» таркибида ўйнаб, кейинчалик «Бунёдкор»га ўтганди. У фаолияти давомида «Бунёдкор», «Аш-Шабаб» (БАА) ва «Ажман» (БАА) клубларида тўп тепган.