Роналду: «Шахсий совринлар ва рекордларга ўч эмасман»

«Ювентус» ҳужумчиси Криштиану Роналду индивидуал совринларини жамоавий ютуқлардан устун қўймаслигини айтиб ўтди.

«Шахсий мукофотларга ҳаддан ортиқ берилиб кетган футболчи эмасман. Муҳими – жамоа ғалабасига ёрдам бериш. Қолган барчаси табиий кетма-кетликда рўй беради.

Рекордлар ўрнатишим борасида ҳам худди шундай фикрдаман. Мен ўз ўйинимимни яхшилаб борганим сайин рекордлар ўз-ўзидан юзага келади, бунга катта аҳамият қаратмайман», – деди Роналду Record билан суҳбатда.

Португалиялик ҳужумчи «Ювентус»нинг Чемпионлар лигасида ғолиб чиқиши эҳтимоли ҳақида ҳам гапириб ўтган.

«Бутун жамоа техник, тактик ва жисмоний жиҳатдан ўсишга эришди. Ғалаба қозониш қийинлашиб бормоқда, шунинг учун ҳам юқори даражамни сақлаб туриш учун яна ҳам қаттиқроқ меҳнат қилишим керак.

Чемпионлар лигасида ғолиб чиқишимиз жуда чиройли чиққан бўларди, бундан хурсанд бўлишим тайин. Аммо ғолиб чиқа олмасак ҳам, бу ҳаётнинг поёни дегани эмас», – деди Роналду.

Эслатиб ўтамиз, 7-рақам эгаси 2018 йилдаги сўнгги ўйинида дубль қайд этиб, «Ювентус»нинг «Сампдория»ни мағлуб этишига (2:1) катта ҳисса қўшди ва 19 ўйинда урган 14та голи билан А Серия тўпурарига айланиб олди.