Мексика Испаниядан ҳиндуларнинг йўқ қилиниши учун узр сўрашни талаб қилди

Мексика президенти Андрес Мануэль Лопес Обрадор Испания қироли Фелипе VI’га Америка қитъаси забт этилиши вақтида унинг туб аҳолиси йўқ қилингани учун узр сўраш талаби билан мактуб йўллади. 

Лопес Обрадор Табаскода конкистадор Эрнан Кортеснинг майя-чонталя ҳиндулари билан жангининг 500 йиллиги муносабати билан бу штатдаги Комалькалько деган жойдаги эҳромга ташриф буюриб, у ерда видеомурожаат ёзган.

“Бу бостириб кириш бўлган, кўплаб адолатсизликлар содир этилган, ҳозир биз Америка деб биладиган жойда яшаган халқлар бўйсундирилган. Мен Испания қиролига ва Рим папасига ҳозирда инсон ҳуқуқлари бузилиши сифатида маълум бўлган қоидабузарликлар учун туб аҳолидан узр сўралиши ҳақида мактуб жўнатдим. Қотилликлар бўлган, халқларга тазйиқ ўтказилган, черковлар эса ҳиндулар ибодатхоналари устидан жойлаштирилган”, деб айтган Лопес Обрадор.  

Мексика президенти ҳам ушбу воқеалар учун узр сўрамоқчи. “Чунки мустамлакачилик давридан кейин ҳам яки, майя туб аҳолисига қарши кўплаб қатағонлар содир этилган ва ҳаттоки Мексика инқилоби вақтида хитойликлар қирилиши юз берган. Биз кечирим сўрашимиз лозим”, деб айтган Мексика президенти.   

Лопес Обрадорнинг айтишича, 2021 йилда Мексика мустақиллигининг 200 йиллиги, ацтеклар пойтахти Теночтитлан (ҳозирги Мехико) қулашининг 500 йиллиги ва унинг ташкил этилганининг 700 йиллиги каби бир нечта муҳим сана нишонланади. “Бу ярашув йили бўлиши лозим”, деб қўшимча қилган Лопес Обрадор.