Президент фармони ижросида кўзбўямачилик қилган Паст Дарғом тумани мутасаддилари яна бир марта ваъда берди

Унинг таъкидлашича, уй топширилса-да, ҳали тайёр бўлмаганлиги учун икки ойдан кейин кўчиб кирган. Унда ҳам вилоят ҳокимлигига бир неча марта мурожаат қилгандан кейин туман ҳокимлиги унга уйни берган.

Бироқ ҳалигача уй ҳужжатлари унга расмийлаштирилмаган. Шу туфайли зарур тўловларни ҳам амалга оширолмай келмоқда. Унга фақат ҳеч нарсага арзимайдиган сертификат — оддий қоғоз берилган, холос.

Ўрганишимиз давомида айнан шу масалада Паст Дарғом тумани ҳокимининг қурилиш масалаларига масъул ўринбосари Толиб Ҳамзаев билан учрашиб, изоҳ сўрагандик.

«Президентимиз фармонидан кейин 2017 йил декабрь ойида ўша вақтдаги туман ҳокими томонидан зудлик билан уч нафар ногиронлиги бўлган шахсга уй топиш лозимлиги ҳақида топшириқ берилди. Аммо янги қурилаётган уй-жойлардан тайёр ҳолатдагиси йўқ эди. Уйга бошланғич тўловларни тўлаган ва қурилиши деярли якунланиб қолган уй эгаларидан сўраб, вақтинча бериб туришини илтимос қилдик. Уларга кейинчалик янги қурилаётган уйлардан берилиши тушунтирилганди. Бу орада Севара Нурмуродовага бошқа ердан кредит асосида уй-жой расмийлаштирилиб, бошланғич тўловлари тўлаб берилган. Аммо у бошқа уйга кўчишни истамаяпти», – дея ҳолатни изоҳлаганди Толиб Ҳамзаев.

«Улар менга тўлови қиммат бўлган уйни таклиф қилишяпти. Арзон уй-жой эмас. Аҳволимни кўриб турибсиз. Ахир, кредитни қандай тўлайман? Ойига олаётган ногиронлик нафақамдан икки баравар кўп тўлаб боришим керак. Ҳозир яшаётган уйим ногиронлиги бўлган, эҳтиёжманд оилалар учун қурилган. Менга расмийлаштириб берилса, ойига тўловни амалга оширишга нафақам етади. У ёғини бир амалларман. Аммо қиммат уй-жойга қурбим етмайди», – деган эди Севара Нурмуродова.

Туман ҳокими ўринбосари Т.Ҳамзаев уйнинг ҳақиқий эгаси бошқа ердан қурилаётган янги уй-жойлардан олишга рози бўлса, Севара Нурмуродовага шу уйни расмийлаштириб беришлари мумкинлигини айтганди.

Бу масала юзасидан уйнинг ҳақиқий эгаси билан суҳбатлашганимизда у бошқа жойдан уй берилса, бу уй Севара Нурмуродовага расмийлаштириб берилишига эътирози йўқлигини билдирган эди. Туман ҳокими ўринбосари Толиб Ҳамзаев бу масала юзасидан зарур ҳужжатларни тез орада расмийлаштиришга ваъда берган эди.

Аммо ушбу ваъда бажарилмагач, биз бу мавзуга қайтиб, масала ечими юзасидан Паст Дарғом туман ҳокимлиги мутасаддилари билан такрор суҳбатлашган эдик.

Бу масала юзасидан «Kun.uz» сайтида 2019 йил 14 январь куни «Севинч ёшлари қайғу ёшларига айланиши. Паст Дарғомда ногиронлиги бўлган она яна алданмоқда» сарлавҳали такрорий мақола эълон қилинганди. 

«Туман ҳокимлиги мутасаддилари бу муаммо юзасидан ҳеч қандай иш қилишгани йўқ. Яна алдашда давом этишмоқда. Тўғриси, уларга ишончим қолмаган. Масала ечим топишига ҳам ишонмаяпман. Фақат ваъдалар билан чекланишаяпти», – деганди Севара Нурмуродова.

Ушбу ҳолат юзасидан яна Толиб Ҳамзаев билан боғланганимизда (Паст Дарғом тумани ҳокимининг қурилиш масалаларига масъул ўринбосари) бу муаммо яқин кунларда ҳал этилиши ҳақида айтиб, яна ваъда берганди.

Афсуски, ваъдалар бажарилмади. Паст Дарғом тумани ҳокимлиги мутасаддиларининг ёлғон ваъдаларидан чарчаган Севара Нурмуродова биз билан боғланиб, бу муаммо ҳал бўлмаётганини, туман ҳокимлиги мутасаддилари Президент фармони ижросини таъминлаш учун кўзбўямачилик қилиб, ундан фойдаланишганини, ўшанда Президентдан жуда миннатдор бўлиб, бу меҳр ва ғамхўрликдан Аллоҳга беҳисоб шукр айтиб, ногиронлиги бўлса-да, ҳаётга ва яшашга бўлган ишончи мустаҳкамланганида туман ҳокимлиги мутасаддилари барчасини чилпарчин қилганини кўзида ёш билан айтиб берди.

Унинг ҳасрати бизни беэътибор қолдирмади. Ижодий гуруҳимиз билан туманга янги ҳоким этиб тайинланган Шунқор Худойбердиев ва ҳоким ўринбосари Толиб Ҳамзаев билан учрашиб, муаммо ечими юзасидан изоҳ сўрагандик.

«Севаранинг муаммосидан хабарим бор. Вилоят ҳокимининг биринчи ўринбосари сифатида ишлаган вақтимда шу муаммо бўйича қабулимга келганди. Уни ҳар томонлама қўллаб-қувватлашга ҳаракат қилаяпмиз. Бу муаммони ҳам тез орада ижобий ҳал қилиб берамиз», – деганди Ш.Худойбердиев. Т.Ҳамзаев эса доимгидек масалани ҳал этишга туман ҳокими олдида яна бир бор ваъда берганди.

Ваъдалар... Ваъдалар. Ногиронлиги бўлган Севара Нурмуродованинг муаммоси ҳанузгача ҳал этилмади ва унга Президент номидан топширилган уй ҳали ҳам расмийлаштириб берилмаяпти.

Бу ҳолат юзасидан яна туман ҳокимлиги мутасаддилари билан боғландик. Туман ҳокимлигининг қурилиш ишлари бўйича мутахассиси Қурбон Мирзаев бу борада амалий ишлар қилинаётганини ва масала бир-икки кун ичида ижобий ҳал этилишини билдирди.

Биз бу сафар ҳам ишондик. Муҳими, алданган, ногиронлиги бўлган Севара Нурмуродованинг муаммоси ижобий ҳал этилсин.

Аслида бошидан ҳаммаси алдовларсиз амалга оширилганда, шунча муаммо юзага келмасди. Ногиронлиги бўлган аёл ҳам шунча овора бўлмасди. Унинг кўзларидан бир йил аввал тўкилган севинч ёшлари бугунга келиб қайғу ёшларига айланмасди.

Туман ҳокимлиги мутасаддилари Президент фармони ижроси юзасидан кўзбўямачилик қилмаганида, оммавий ахборот воситалари учун «саҳна кўриниши» уюштиришмаганида икки фарзанди билан яшаётган ногиронлиги бўлган аёл шунча сарсон-саргардон бўлмас эди. Унинг вилоят ва туман мутасаддиларига бўлган ишончи чилпарчин бўлмас эди. 

Kun.uz воқеалар ривожини кузатишда давом этади.

Бардошбек САМАД ўғли,

Kun.uz мухбири.