«Райо Вальекано» ўз уйида «Қироллик клуби»ни мағлубиятга учратди (1:0).
Испания чемпионати
35-тур
«Райо Вальекано» – «Реал» – 1:0 (1:0)
Гол: 1:0 – 23, пенальти Эмбарба.
«Райо Вальекано»: Гарсия, Тито, Гальвес, Ба, Алекс Морено, Эмбарба, Уче Агбо, Марио Суарес (Медран, 77), Посо (Трехо, 85), Бебе (Альваро Гарсия, 78), Хави Герра.
«Реал»: Куртуа, Карвахаль, Вальехо, Варан, Марсело, Модрич (Иско, 74), Льоренте, Кроос, Бэйл, М.Диас (Васкес, 82), Себальос (Б.Диас, 61).
Огоҳлантиришлар: Вальехо, 22. Модрич, 28. Марио Суарес, 43. М.Диас, 62. Карвахаль, 79. Марсело, 86. Уче Агбо, 90+3.
Ҳакам: Гонсалес Фуэртес.
28 апрель. Мадрид. Campo de Futbol de Vallecas стадиони.
Мотивация ва Бензема йўқлиги
Энди Испания чемпионати турнир жадвалидаги ҳолат «Реал» учун қизиқарли эмас - бронзани бу жамоадан ҳеч ким тортиб ололмайди, кумушга эса етиш қийин - Зинедин Зидан футболчиларни ўзи истаса ҳам ғалабага чанқоқ ҳолатда чиқара олмайди. Шу туфайли, бу ўйинга аралаш таркиб туширилгани тушунарли ҳол эди. «Райо Вальекано»га қарши ўйинда бошланғич таркибдан жамоа сардори Серхио Рамос (уни Вальхео алмаштирди) ва «Реал»нинг охирги 8 голига муаллифлик қилган Бензема ўрин олишмади (унинг ўрнини Мариано Диас эгаллади).
Ҳаёт-мамот жангидаги «асаларилар»
«Реал»дан фарқли равишда Мадриднинг бу кичик жамоасига очколар сув ва ҳаводан ҳам кўра зарурроқ эди - Испания пойтахти жанубидан бўлган бу жамоа турнир жадвалининг энг қуйи қисмида жойлашган ва лигада қолиш учун курашмоқда. Ҳамшаҳарлари устидан ғалаба қозонса, жамоа 20-ўриндан 19-ўринга кўтарилар ва 17-ўриндаги «Жирона»билан орадаги фарқни 6 очкога қисқартирарди. Бунинг учун қаттиқ курашиш талаб этиларди.
Эмбарбанинг пенальтиси
Ўйиннинг 10-дақиқасигача жамоалар хавфли вазиятлар билан алмашишди - аввалига Марсело «Райо» дарвозабонини синовдан ўтказди, яна бир вазият Посо томонидан уюштирилди, у бельгиялик дарвозабонни яқин масофадан доғда қолдиролмади, кейин эса ҳакам меҳмонлар дарвозасига пенальти қўйди: Хави Герра Вальехонинг фолидан кейин газонга қулади, ҳакам видеоҳакам маслаҳати билан 11 метрли нуқтани кўрсатди. Эмбарба зарба беришда хато қилмади ва «Реал» 2005-06 йилги мавсумдан буён биринчи марта чемпионат ўйинларида етти марта пенальтидан гол ўтказди.
