Тошкент врачлар малакасини ошириш институтида «Ҳамшира–2019» республика кўрик-танловининг якуний босқичи бўлиб ўтди. Анъавий тарзда ўтказилиб келинаётган мазкур танлов Соғлиқни сақлаш вазирлиги, Соғлиқни сақлаш ходимлари касаба уюшмаси Республика кенгаши, Республика Ҳамширалар ассоциацияси ҳамкорлигида ташкил этилди. Унда танловнинг Қорақалпоғистон Республикаси, вилоятлар ва Тошкент шаҳар босқичларида ғолиб бўлган 14 нафар ҳамшира ўзаро беллашди.
«Шу ўринда таъкидлаш жоизки, ҳамшираларимизнинг соғлиқни сақлаш тизимидаги ислоҳотларни ҳаётга татбиқ этишда уларнинг ўрни муҳим аҳамият касб этади. Шу боис, юртимизда олиб борилаётган тиббий-ижтимоий ислоҳотлар жараёнида ҳамширалик ишини ривожлантиришга алоҳида эътибор қаратилмоқда. Тиббий таълим тизими халқаро талаблардан келиб чиқиб такомиллаштириляпти.
Бугунги кунда Тошкент тиббиёт академияси ва тиббиёт институтларининг «Олий ҳамширалик иши» бўлимларида турли йўналишлар бўйича 5 минг нафарга яқин олий маълумотли бакалавр хамширалар тайёрланди, юзга яқин ҳамширалар магистр даражасига эга. Яна бир эътиборли жиҳати, 18 нафар олий маълумотли ҳамшира тиббиёт соҳасида фалсафа доктори (PhD) илмий унвонига эга бўлди. Олий маълумотли ҳамширалар ва ўрта тиббиёт ходимларининг малакасини ошириш тизими ҳам тубдан такомиллашяпти.
Анъанавий тарзда ўтаётган «Ҳамшира» республика кўрик танловининг ҳам ўрта тиббиёт ходимлари фаолиятини қўллаб-қувватлаш, иқтидорли ёшларнинг интилишларини рўёбга чиқаришда алоҳида ўрни бор. Танловнинг бу йилги барча босқичлари ҳам уюшқоқлик билан ташкил этилди.
Ўтган йиллардан фарқли равишда бу йил танловни ўтказиш тартиби, баҳолаш мезонлари янада такомиллашди. Танловда асосий эътибор ҳамшираларнинг билими, интеллектуал ва касбий салоҳиятига қаратиладиган бўлди. Шунингдек, иштирокчиларнинг тиббиёт билан бирга мамлакатимиздаги сиёсий жараёнлар, соғлиқни сақлаш тизимидаги ислоҳотларга дахлдорлик туйғуси, фаол фуқаролик позицияси баҳолашнинг муҳим мезонларидан этиб белгиланди», дейилади Соғлиқни сақлаш вазирлиги Жамоатчилик билан алоқалар бўлими хабарида.
Танлов натижаларига кўра, Наманган вилояти Янгиқўрғон туман тиббиёт бирлашмаси шошилинч тиббий ёрдам бўлими хирургия пости навбатчи ҳамшираси Дилафрўз Паттаева биринчи ўринни қўлга киритди. Фарғона вилояти перенатал маркази қабулхона бўлими катта дояси Зуҳрахон Ҳайдарова иккинчи, Жиззах вилояти Пахтакор туман тиббиёт бирлашмаси ҳомиладорлар патологияси бўлими муолажа ҳамшираси Сарвиноз Қўшбоқова учинчи ўринга сазовор бўлди. Ғолибларга танлов ташкилотчилари томонидан диплом ва қимматбаҳо совғалар тақдим этилди.
Маълумот учун, анъанага мувофиқ «Ҳамшира–2019» танлови ғолиблари тиббиёт олий ўқув юртларига имтиёзли асосда ўқишга қабул қилиниши белгиланган.
