Ҳонгконгда жиноятчиликда гумон қилинганларни Хитойнинг материк қисмига экстрадиция қилиш ҳақидаги қонун туфайли бир неча кун олдин бошланган оммавий намойишлар янги босқичга ўтди. 12 июнь куни тонгда минглаб намойишчилар ҳукумат бинолари жойлашган ҳудудга олиб борувчи йўлларни тўсиб қўйди.
Кўчага чиққанларнинг аксари - ёшлар ва талабалар, уларнинг кўпчилик қисми ниқоблар тақиб, шлемлар кийган. Полициячилар уларни кўздан ёш оқизувчи газ билан тарқатиб юборишга ҳаракат қилди, куч ишлатилиши ҳам мумкинлиги маълум қилинди.
Ҳонгконг қонунчилик кенгаши 12 июнь куни қонун лойиҳасини иккинчи ўқишда кўриб чиқиши керак эди, намойишлар туфайли ҳукумат буни кейинга қолдиришга қарор қилган. Маҳаллий нашрлар хабарига кўра, якуний ҳужжат 20 июнь куни қабул қилиниши мумкин.
Қонун лойиҳаси ҳақидаги хабарлардан кейин 9 июнь куни норози одамлар кўчаларга чиқди. Бу митинг 1997 йилдан буён кузатилган энг йирик намойишларга айланди - норасмий манбаларга кўра намойишларда миллиондан ортиқ киши иштирок этди.
Ҳукуматнинг айрим вакилларига ўлим билан таҳдид қилинди.
Қонун лойиҳаси ХХР, Тайван ва Макао ҳукуматлари томонидан йўлланган экстрадиция бўйича сўровларни кўриб чиқишни кўзда тутади. Ҳозирда Ҳонгконгда бундай келишув мавжуд эмас. Ҳукумат бундай чоралар фақат жиддий жиноятларда (қотиллик ва зўравонлик) айбланганларга тааллуқли бўлишини билдирган. Суд ҳар бир ҳолат бўйича алоҳида қарор чиқаради. Қонун тарафдорлари экстрадиция сиёсий жиноятларда айбланганларга қўлланмаслигига ишонтиришмоқда. Аммо ҳужжат танқидчилари бунинг аксини айтишмоқда, улар ХХР суд тизими қийноқларга рухсат беришини эслатишмоқда.
