Ҳонгконг суди 5 ноябр, пайшанба куни демократик ҳаракат фаоли Жошуа Вонгни хорижий кучлар билан тил бириктириш айблови бўйича яна ўн йилга озодликдан маҳрум қилди. У 2024 йилда Ҳонгконг тарихидаги миллий хавфсизлик ишлари бўйича энг йирик суд жараёни доирасида «давлат ҳокимиятига путур етказиш» учун ҳукм қилинган ўнлаб арбоблар орасида бўлган.
Жошуа Вонгнинг жиноий таъқиб қилиниши
Жошуа Вонг — Ҳонгконгдаги демократик намойишларнинг энг таниқли иштирокчиларидан бири. У қарийб олти йилни панжара ортида ўтказган. 2024 йилда фаол «давлат ҳокимиятига путур етказиш» иши бўйича 4 йил-у 8 ойга озодликдан маҳрум қилинган эди. У жазосини ўтаётган пайтда унга қарши «хорижий кучлар билан тил бириктириш» бўйича янги иш очилди. 2026 йил сентябрида Вонг айбига иқрор бўлди.
Вонгга чиқарилган янги ҳукм Пекин «Ҳонгконгни қаттиқ назорат қилаётгани ва бу ерда 2019 йилгача мавжуд бўлган нисбатан эркин муҳитга қайтиш имконини қолдирмаётгани»ни намойиш этиш истагини ифодалайди, деди Лондон университетининг SOAS таркибидаги Хитой институти директори Стив Цанг AFP агентлигига.
Ҳонгконгдаги намойишлар
2019–2020 йилларда Ҳонгконгни оммавий норозилик намойишлари тўлқини қамраб олди. Намойишчилар Пекиннинг мухтор ҳудуддаги таъсири кучайишига ва унинг аҳолиси фуқаролик эркинликларини чекловчи қарорлар қабул қилинишига қарши чиқди. Намойишлар кўпинча кўчалардаги тартибсизликлар ва полиция билан тўқнашувлар билан кечди.
Ушбу намойишлар фонида Бутунхитой халқ вакиллари кенгашининг Доимий қўмитаси 2020 йил июн ойи охирида Ҳонгконг миллий хавфсизлиги тўғрисидаги қонунни қабул қилди. Қонун айирмачилик фаолияти учун жиноий жазо белгилайди.
