Руҳоний АҚШнинг Хоманаийга қарши санкцияларини мантиқсизлик ва аҳмоқона ҳаракат деб атади

Эрон президенти Ҳасан Руҳоний АҚШнинг мамлакат олий диний раҳнамоси Али Хоманаийга қарши санкцияларини мантиқсизлик ва аҳмоқона ҳаракат деб атади.

Аввалроқ АҚШ президенти Дональд Трамп Эроннинг олий диний раҳнамоси етакчиси оятуллоҳ Али Хоманаийга қарши санкциялар жорий этиш тўғрисидаги фармонни имзолаганди.  

"Кўряпсизларми, кимдир дабдурустдан мантиқсиз ва аҳмоқона ҳаракатларни амалга оширмоқда. Улар мамлакат етакчисини бойкот қилишаётганини айтишмоқда... улар етакчининг мулкларига санкциялар киритишни исташаётганини айтишмоқда, аммо етакчимиз оддий ҳаёт кечиради, унинг бор-йўқ нарсаси – сажда қиладиган жойи ва оддий ҳаёт, у миллиардлаб ёки миллионлаб долларга эга хориж етакчиларидек эмас" , -деди Руҳоний.

АҚШ вице-президенти Майк Пенс санкциялар Эрон АҚШ дронини уриб туширгани ҳамда Уммон кўрфазида иккита нефть танкерига ҳужумлар уюштирганига жавобан киритилишини айтганди.