Дунёнинг энг сердаромад аёл спортчилари рейтинги эълон қилинди 

Forbes нашри 2019 йилнинг энг сердаромад 15 аёл спортчиси рейтингини эълон қилди. 

Рейтингга америкалик теннисчи Серена Уильямс етакчилик қилмоқда, унинг даромади 29,2 млн долларга баҳоланган. Ўтган йилги рейтингга нисбатан спортчи 1-ўринни сақлаб қолган, бироқ унинг жорий рейтингдаги даромади 10 млн долларга кўпроқни ташкил қилган. 

2-ўринни 21 ёшли япониялик теннисчи Наоми Осака 24,3 млн долларлик даромад билан эгаллаган. Қайд этиш жоиз, рейтингнинг илк 11 поғонасини теннисчилар эгаллаган ҳамда Уильямс ва Осака рейтингда анча фарқ билан етакчилик қилмоқда. 

Етакчи ўнталикдан германиялик Анжелик Кербер (11,8 млн доллар), Симона Халеп (Руминия, 10,2 млн доллар), Слоун Стивенс (АҚШ, 9,6 млн доллар), Каролин Возняцки (Дания, 7,5 млн доллар), Мария Шарапова (Россия, 7 млн доллар), Каролина Плишкова (Чехия, 6,3 млн доллар), Элина Свитолина (Украина, 6,1 млн доллар), Винус Уильямс (АҚШ, 5,9 млн доллар) ва Гарбинье Мугуруса (Испания, 5,9 млн доллар) ўрин олган. Яна бир теннисчи Мэдисон Кей 5,5 млн долларлик даромад билан 13-ўринни эгаллаган.

Рейтингга бошқа спортларнинг фақатгина 3 вакиласи киритилган. Улар: АҚШ терма жамоаси футболчиси Алекс Морган (12-ўрин, 5,8 млн доллар), ҳиндистонлик  бадминтончи Пурсала Синдху (13-ўрин, 5,5 млн доллар) ва таиландлик гольфчи Ария Жутанугарн (15-ўрин, 5,3 млн доллар).

Июнда Серена Уильямс Forbes талқини бўйича энг сердаромад спортчилар юзталигидан ўрин олган ягона аёл спортчи бўлганди (63-ўрин). Рейтингга эса футболчилар Лионель Месси (127 млн доллар), Криштиану Роналду (109 млн доллар) ва Неймар (105 млн доллар) етакчилик қилган.