Янгийўлда 1,5 йилдирки президент совғаси берилмаяпти. Мурожаатчи шикояти, ҳокимлик ваъдалари...

Андижонда алданган аёллар ҳақидаги коттеж машмашаси ҳали кўпчиликнинг ёдида. Ушбу можаро ижтимоий тармоқларда кенг муҳокамаларга сабаб бўлди.

Тошкент вилояти, Янгийўл туманида яшовчи Алиевлар оиласи ҳам шунга ўхшаш вазиятда. Президент Шавкат Мирзиёев 2018 йилнинг январида мазкур ҳудудга ташрифи давомида эски, ҳолати ҳаминқадар бўлган туман тиббиёт бирлашмасида ҳам бўлган эди. Беморлар билан суҳбат давомида давлат раҳбари ёши улуғ онахонга, бир йилда икки фарзандидан айрилган аёл Зулайҳо Алиевага «отасиз қолган набираларингиз учун» деб уй совға қилганди.

Ўша онахоннинг ўғли, сайт таҳририятига мурожаат қилган Умарали Алиевнинг сўзларига кўра, ўтган бир ярим йилдан буён уйдан дарак йўқ, давлат раҳбарининг совғасини олмоқчи бўлган бу оила ҳокимликлар ўртасида сарсон бўлиб келмоқда. Биз ҳолатга ойдинлик киритиш мақсадида оила яшаб келаётган хонадонга йўл олдик.

Камсуқумгина ўзбек оиласи билан учрашдик. Бир пиёла чой устида суҳбатимиз бошланди. Сўзни аввал катталарга бердик.

«2017 йил, янги йил арафасида уйда ўзим қолгандим. Бувиси (Зулайҳо Алиев – таҳр.) ҳам ўғлимникига чиқиб келаман, деб борган эди. Кечки соат 2:00лар чамаси ўғлим югуриб чиқди. «Онам шифохонага тушиб қолибди» деди. Шифохонага борсам ҳушсиз ётган экан. Эрталаб борсам ўзига келибди. Шундан сўнг 3-4 кун даволанди. Кейин, 5 январь куни президентимиз шифохонага кириб келган. Кириб айнан буларнинг олдига кирибди ва мулоқот қилибди. Ўша куни кечки вақт олдимга мухбирлар келишди. Мен нималар бўлаётганини тушунмадим. Уй совға қилинганини айтишганди, президентдан уй сўрабдими деб ҳайрон бўлиб савол бердим. Келганлар «Бу уй сиз учун ҳам эмас, аёлингиз учун ҳам эмас. Президент уйни 3 нафар етим қолган невараларингиз учун берди. Кирсак майлими?», деб дўқ қилганнамо гапиришди. Фақат ҳаммасини тўғри етказинглар, бировнинг ортидан кимдир калтак еб қолмасин, дея йиғлаб тушунтирдим. Мухбирлар совға тўлиқ олингунча тепасида туришларини айтишди. Икки кундан кейин ҳокимиятга чақиришди. Туман ҳокими билан гаплашдим. Бадаллар, уй нархлари ҳақида айтишди. «Кечирасизлару, менга уй беринглар демаганман. Невараларимга уй совға қилинибди. Сизни тушунмаяпман. Бир хонали уй таклиф қиляпсиз, бутун дунё эшитди-ку 3 хонали уй совға қилинганини. Орадан бир кун ўтибоқ, 1 хоналига тушиб қолди. Мен бундай уйни олсам, президентимиз лафзсизга чиқиб қолади-ку» дедим. Шундан кейин ҳоким аччиқланиб кетди ва «3 хонали уй дейилган бўлса 3 хонали, 3 қаватли дейилган бўлса 3 қаватли уй қуриб берамиз сизга. Сиёсатга айлантирманг», деди.

Кейин 2018 йилда қурилиши режалаштирилган уйлардан беришларини айтишди. Мен рози бўлдим. Шошилинч бўлса, бошқа туманлардан топиб берай деди. Бу совғалигини, қандай қилиб шошилинч бўлиши мумкинлигини айтдим. Шундан кейин вилоят ҳокимига тилхат ёзишимни сўрашди. Бир хонали уйни рад этдим, 2018 йилда қуриладиган уйлардан 3 хоналисини олишга розиман, деб ёзишимни айтишди. «Бир хонали уйни рад қилиш» ҳақидаги жойига эътироз билдирдим. Ахир, 3 хонали дейилган-ку дедим. Бизга берилган жавоб хатида эса «сиз шароитингиз оғирлиги ва бошланғич тўловини тўлай олмаслигингиз сабабли» деган сўзлар ишлатилмоқда. Бадал, бошланғич тўловлар, бизнинг шароитимиз оғирлиги ҳақида гаплар қаердан келди?», – дейди оила бошлиғи Муҳаммадзуфар Алиев.

Шундан сўнг, президент билан юзма-юз гаплашган онахон Зулайҳо Алиевадан фикр сўрадик.

«Ўшанда бир кун олдин комиссия келишини айтишди. Ҳамма жойни тозалашди. Эрталаб шифокорлар давлат раҳбари келишини айтиб қолишди. Палаталарни текширишди. Палатамиз яхшилигини, агар кўнгиллари тўлмаётган бўлса эшигимизни ёпиб қўйишимизни айтдим. Шундан сўнг, бизнинг палата эшигини беркитишди. Қолган эшиклар очиқ қолди. Хонамиздан нарироқда мажлис ўтказадиган хона бор эди. Мажлис бўлиб, кейин қайтиб кетишди. Мен шерикларимни тинчлантириб, президент бу ерга шароит яратиб бериш учун келишини, шароитни кўриб кетишга қизиқишини айтдим. Шу гапни айтганимни биламан эшик очилди ва президент кириб келди. Аввал эшикнинг ёнида ётган аёл билан гаплашди, ҳол-аҳвол сўради. Кейин мен билан суҳбатлашди. «Яхшимисиз, онажон? Нима бўлди сизга? Нега ётибсиз ҳамма жойингиз кўкарган ҳолда?», дея савол берди. Мен 8 йил олдин қизимдан, бир йил ичида икки ўғлимдан айрилганимни, балки шу йўқотишлар таъсирида йиқилиб қолганимни айтдим. Катта ўғлимдан қолган невараларим ҳақида ҳам гапирдим.

«Мен шу 3 гўдакнинг ўксик қалбларини озгина бўлса ҳам кўтара олсам, 3 хонали уй уларга совға. Яна нима муаммо?», деб сўради. Мен пенсия масаласида муаммо борлигини, ҳали ҳам ҳал бўлмаётганини айтдим. Президент бу муаммони ҳам ҳал қилишга кўрсатма берди. Лекин бу масала ҳал бўлмади. Уй масаласида туман ҳокимига бордим. У бу ишни Янгийўл шаҳар ҳокими ҳал қилишини айтди. Бизга ҳали буйруқ келгани йўқ дея изоҳ берди. Ҳозиргача отангга бор, онангга бор бўляпти», дейди онахон.

«Менга қоғоз гапиради»

Ёши улуғлар бундай ишларга кучи, асаби етмаслиги сабаб югур-югур ишларни фарзандлари Умарали Алиевга топширишади. Воқеаларнинг давомини у кишидан сўрадик.

«Президент онам билан учрашганидан сўнг, онамни даволатиш учун Республика кардиология бўлимига ўтказишганини айтишди. Тез етиб келишимни сўрашди. Мен Тошкентга бордим, ўша журналист қиз билан учрашдим. Маълум вақт ўтганидан сўнг, туман ҳокими олдига бордим. 3 нафар етим болага берилган уй бўйича келганимни айтдим. Ҳоким шахсан менга буйруқ берилгани йўқ, деди. Менга қоғоз гапиради. Ўзбошимчалик давлат уйини, мулкини сенга беролмайман, деди», дея тушунтириш берди у.

Хонадон эгалари билан суҳбатимиз чоғида уларнинг уйга муҳтожлик жойи йўқлиги, давлат раҳбари уйни 3 норасида гўдак учун бергани сабабли сўраб боришганини айтишди.

«30 ёшидаёқ вафот этиб кетган фарзандимга Худойимнинг назари тушган эканки, давлат раҳбарининг дилига солибди. Энди агар бермаймиз дейишса ва биз уларнинг ризқи учун курашмасак, бу отасиз болаларнинг ҳаққи энди бизнинг бўйнимизда қолади», дейди отахон.

Ҳокимликнинг ваъдалари

Суҳбатдан сўнг туман ҳокимлиги томон йўл олдик. Бироқ ҳокимлик биносига кирганимизда туман ҳокими топшириқ билан бошқа вилоятда эканлигини айтишди. Бизни туман ҳокимининг ёшлар масалалари бўйича ўринбосари Ўткир Рашидов қабул қилди.

«Бу иш муаммо бўлаётганидан хабарим йўқ. Биринчи марта тўқнаш келяпман. Туманнинг «Умид» номли ҳудудидан ҳокимлик маҳаллий бюджети ҳисобидан 5та иккиқаватли уйлар қурилмоқда. У жойдан ҳам беришимиз мумкин. Бундан ташқари, 2019-2020 йилларга белгиланган «Йўл харитаси»га мувофиқ кўпқаватли уйлар қурилади. Шу уйлардан ҳам бериш имкониятимиз мавжуд. Муаммо бўлмайди», дея таъкидлади масъул шахс.

Туман ҳокими ўринбосари бир неча бор «бу президент томонидан берилган совға ва бизга айтилган топшириқ. Давлат раҳбари айтган топшириқ муҳокама қилинмайди. Ҳозироқ масала ҳал қилинади» деб қатъий оҳангда ваъда берди.

Президент томонидан айтилган яна бир масала, Зулайҳо Алиеванинг пенсияси масаласида туман хотин-қизлар масалалари бўйича ўринбосари Нилуфар Нормирзаева билан қўнғироқлашдик. Мутасадди аёл бу ишни ўз назоратига олиб, тез орада ҳал этилишини айтди.

Янгийўлда ҳозирча шулар. Президент бир ярим йил аввал 3 нафар етим болага уй совға қилинишини ваъда қилган, бемор онахонга кўмак кўрсатганди. Давлат раҳбари томонидан берилган топшириқлар маҳаллий ҳокимият томонидан ҳозирча бажарилмаган, аммо ваъдалар берилди. Умид қиламизки, ҳокимлик вакиллари ўз ваъдаларида туришади ва президент берган топшириқни охирига етказишади.

Kun.uz воқеалар ривожини кузатиб боради

Баҳодир Аҳмедов