Лойиҳа Groupwork архитектура бюроси ва Webb Yates муҳандислик компанияси ҳамкорлигида амалга оширилган.

Petra Heights Лондондаги 317 Finchley Road манзилида жойлашган бўлиб, баландлиги олтидан ўн қаватгача бўлган учта алоҳида блокдан иборат.

Бинонинг энг ғаройиб жиҳати — унинг асосий юк кўтарувчи конструкцияси ташқи қисмида жойлашган арматураланмаган тош панжара-экзоскелет экани.

У нафақат бинога тушадиган оғирликни, балки шамол юкларини ҳам қабул қилади. Шу сабаб лойиҳада одатда баланд биноларда ишлатиладиган бетон қаттиқлик ўзаги ва бетон устунлар мавжуд эмас.

Бундан ташқари, конструкцияда анъанавий маънодаги пўлат арматура ҳам қўлланилмаган. Тош бир вақтнинг ўзида ҳам юк кўтарувчи элемент, ҳам фасад вазифасини бажаради. Шу боис бинога алоҳида фасад қопламаси керак бўлмаган.

Қандай тошлар ишлатилган?

Petra Heights каркаси асосан икки хил вулқон тошидан — Сицилия базалти ва Норвегия ларвикитидан ташкил топган.

Муаллифлар бу лойиҳани архитекторлар ва муҳандисларнинг қарийб 15 йиллик тадқиқотлари давоми сифатида кўрсатмоқда. Уларнинг мақсади — табиий тош пўлат ва бетонга амалий ҳамда нисбатан кам углеродли муқобил бўла олишини исботлаш.

Манбада қайд этилишича, пўлат ва бетон ишлаб чиқариш биргаликда инсониятнинг глобал чиқиндиларининг тахминан 16 фоизига тўғри келади.

Мутахассислар ҳисоб-китобига кўра, Petra Heightsʼда қўлланган тош экзоскелет технологияси пўлат каркасли ўхшаш конструкция билан солиштирганда чиқиндиларни тахминан 80 фоизгача камайтириш имконини бериши мумкин. Муҳими, улар бу натижа қўшимча қурилиш харажатларисиз эришилиши мумкинлигини таъкидламоқда.

Шунингдек, мутахассислар мазкур конструктив принципни келажакда 30 қаватли осмонўпар биноларгача масштаблаш мумкин, деб ҳисобламоқда.

Анъанавий материаллардан тўлиқ воз кечилмаган

Шу билан бирга, Petra Heights бутунлай тошдан қурилган эмас.

Қурилиш майдони мураккаб ҳудудда — темир йўл станцияси ва олти тасмали Finchley Road автомагистрали орасида жойлашган. Шу сабаб айрим анъанавий материалларни сақлаб қолишга тўғри келган.

Бинонинг ерости қисми пойдевори бетондан қурилган, қаватлараро ёпмаларда ҳам бетон ишлатилган. Бундан ташқари, ишлатилган тошнинг бир қисмини хориждан олиб келишга тўғри келган.