АҚШ президенти Доналд Трамп 18 сентябр куни H.R. 5334 — Lindsey O. Graham Sanctioning Russia and Iran Act of 2026 қонунини имзолади. Оқ уй ҳам ҳужжат кучга кирганини расман тасдиқлади. Қонун Россияга нисбатан санкциялар, тарифлар ва бошқа чекловларни кенгайтиришни, шунингдек, Эронга қарши амалдаги санкцияларни узайтиришни назарда тутади.
Янги қонун АҚШ президентига Россия нефти ва табиий газини энг кўп харид қиладиган бешта давлатга нисбатан 100 фоизгача бож жорий этиш ваколатини беради. Шунингдек, Россияга энергетика соҳасидаги санкцияларни четлаб ўтишга ёрдам бераётган давлатларга нисбатан ҳам чоралар қўлланиши мумкин.
Айни пайтда, ҳужжатда айрим истиснолар ҳам назарда тутилган. Хусусан, Россиядан импорт қилинадиган газ улуши белгиланган чегарадан паст бўлган ва Россия энергия ресурсларига қарамликни камайтириш бўйича чоралар кўраётган давлатлар айрим тарифлардан озод қилиниши мумкин.
Қонун фақат Россия энергетика ресурсларининг хорижий харидорларига қаратилмаган. У Россиянинг энергетика ва мудофаа тармоқлари, молия институтлари, мансабдор шахслари ҳамда амалдаги санкцияларни четлаб ўтишда фойдаланилаётган «соя флоти»га нисбатан ҳам чекловларни назарда тутади. Reuters маълумотига кўра, ушбу чораларнинг мақсади Россиянинг Украинадаги урушни молиялаштириш имкониятларини чеклашдир.
Қонун лойиҳаси дастлаб 2025 йил апрелида республикачи сенатор Линдси Грэм ва демократ сенатор Ричард Блюментал томонидан илгари сурилган эди. Дастлабки вариантда Россия билан савдо қилаётган ва унинг нефтини харид қилаётган давлатларга нисбатан 500 фоизгача бож жорий этиш ғояси муҳокама қилинган. Шу сабабли бу чоралар оммавий ахборот воситаларида «аёвсиз санкциялар» деб ҳам атала бошлаган. Кейинчалик энг юқори тариф миқдори 100 фоизгача туширилди.
Ҳужжат Конгрессда узоқ муҳокама қилинди. Вакиллар палатаси уни 16 сентябр куни 262 овозга 159 овоз билан қабул қилди. Шундан сўнг қонун лойиҳаси президент имзоси учун юборилди.
Қонуннинг якуний таҳрири президентга санкция ва тариф механизмларини қўллаш бўйича кенг ваколат беради. Трамп маъмурияти август ойидаёқ тариф ваколатларини қонуннинг муҳим қисми деб атаган ва улар Россияни Украинадаги урушни тугатиш бўйича келишувга ундаш воситаси сифатида ишлатилиши мумкинлигини билдирган эди.
Украина президенти Володимир Зеленский қонун имзоланишини олқишлаб, АҚШ президенти ва уни қўллаб-қувватлаган Конгресс аъзоларига миннатдорлик билдирди. У иқтисодий босимни кучайтириш Россияни урушни тугатишга ундайдиган воситалардан бири эканини таъкидлади.
