Namangan Сity қурилиши учун Саудия Арабистони компанияси билан меморандум имзоланди

18 октябрь куни Наманган вилояти ҳокимлиги ҳамда Саудия Арабистонининг «Al Qusaier company» компанияси ўртасида Наманган шаҳрида Namangan Сity ишбилармонлик маркази қурилиши лойиҳасини амалга ошириш бўйича англашув меморандуми имзоланди. Бу ҳақда Kun.uz’га Наманган вилоят ҳокимлиги матбуот хизмати хабар берди.

Вилоят ҳокими Хайрулло Бозоров ҳамда «Al Qusaier company» бош директори Абдулазиз ал-Қусайр томонидан имзоланган меморандумга кўра, «Namangan Сity» Наманган шаҳрида 78 гектар майдонда барпо этилади. Ишбилармонлик марказидан бизнес-марказ, замонавий савдо мажмуалари, 3-4-5 юлдузли меҳмонхоналар, офислар, конференциялар саройи, кўргазма заллари, турар-жойлар ва виллалар, мактаб, болалар боғчаси, ресторанлар ва бошқа ижтимоий соҳа объектлари ўрин олади.

Лойиҳани молиялаштириш тўлалигича «Al Qusaier company» компанияси маблағлари ҳисобидан амалга оширилади.

Вилоят ҳокимлиги «Namangan Сity» фаолияти учун зарур бўлган инфратузилма (электр энергияси, газ ва сув таъминоти, канализация, кириш йўллари ва бошқалар) билан таъминлашга доир масалаларни ҳал этади ҳамда лойиҳани амалга ошириш учун керакли рухсатномаларни олишда ва лойиҳани амалга ошириш ва фойдаланиш даврида малакали кадрлар билан таъминлашга кўмаклашади.