Дунё компанияларининг энг самарадор раҳбарлари рейтингини эълон қилинди

Женсен Хуан / Фото: Patrick T. Fallon / Bloomberg

АҚШнинг Harvard Business Review (HBR) нашри дунё компанияларининг энг самарадор бош директорлари юзталигини тузди.

Рейтингга кўра, 1-ўринни АҚШнинг NVIDIA компанияси ҳамасосчиси, президенти ва бош директори 56 ёшли Женсен Хуан эгаллади.

Таъкидланишича, Хуан Тайванда туғилиб, 10 ёшида АҚШдаги қариндошлариникига кўчиб ўтган, у ерда Орегон университетининг муҳандис-электрик дипломини олган. Сўнгра Кремний водийсига ўтиб, AMD процессорини ишлаб чиқарувчи компания ва LSI Corporation’да ишлаган.

Хуан 1993 йилда Sun Microsystems’нинг собиқ ходими Крис Малаховски ва дўсти Кэртис Прем билан бирга видеокарталар ишлаб чиқарувчи NVIDIA компаниясига асос солган. Ўшанда компанияни ташкил этишга киритилган сармоя қиймати 40 минг долларни ташкил қилган, ҳозирда эса компания капиталлашуви 100 млрд доллардан ошади. Forbes маълумотларига кўра, Хуаннинг шахсий бойлиги 4,6 млрд долларга баҳоланади.

2-ўринни дастурий таъминот ишлаб чиқарувчи Salesforce компанияси асосчиларидан бири Марк Бениофф (бу лавозимни 2001 йилдан эгаллаб келади), 3-ўринни Kering француз компанияси директорлар кенгаши раиси Франсуа-Анри Пино (компания учун ишлашни бошлаган йили 2005 йил), 4-ўринни Texas Instruments президенти Ричард Темплтон (2004 йил) эгаллаган. Етакчи бешталикдан Iberdrola бош директори Игнасио Галан ҳам ўрин олган (2001 йил).

Рейтингнинг охирги ўрнини Brookfield Asset Management компанияси бош директори Брюс Флэтт эгаллади.

Рейтингни тузган экспертларнинг таъкидлашича, ўтган йилги рейтингга киритилган 65 киши жорий йилги рейтингга ҳам киритилган. Ундан чиқиб кетганлар орасида эса Amazon раҳбари Жефф Безос каби “гигантлар” ҳам бор. Бу эса рейтингни тузишдаги ҳисоб-китоб усули ўзгаргани билан тушунтирилган.

Шунингдек, рейтингга кам сонда аёллар киритилгани қайд этиб ўтилган. Рўйхатдан бор-йўғи 4 аёл раҳбар ўрин олган: Wolters Kluwer раҳбари Нэнси Маккинстри (16-ўрин), Advanced Micro Devices раҳбари Лиза Су (26-ўрин), Ventas раҳбари Дебра Кафаро (29-ўрин) ва Lockheed Martin раҳбари Мэрилин Хьюсон (37-ўрин).

“Бу ҳолат кўрсаткичлар билан эмас, балки умуман компанияларда раҳбарлик лавозимларини аёллар кам эгаллагани билан боғланган. Биз буни ранжитувчи ҳолат деб ҳисоблаймиз”, деб айтилган HBR’да.