Австралия термаси футбол тарихида бир қатор рекордлар соҳиби ҳамдир. Австралия 2001 йилнинг 11 апрелида Шарқий Самоа термасини 31:0 ҳисобида мағлубиятга учратди. Бу натижа терма жамоалар ичида рекордга айланди. Ўйинда австралиялик Арчи Томпсон 13 та гол киритди ва яна бир рекордни қайд этди;
Ўтган асрнинг 70-йилларида Бельгияда бир ўйин ўтказилди. Унда икки жамоанинг барча ўйинчилари ва майдондаги уч ҳакамнинг фамилияси бир хил - Ван Лой эди;
Дунё бўйлаб чўчқа гриппи авж олган 2009 йилда мексикалик футболчи Эктор Рейносо қизишиб кетди ва рақиби юзига аввал туфлаб, кейин аксирди. Камига чўчқа гриппи билан касалланганини ҳам писанда қилиб қўйди. Бу қилиғи учун футболчи бир неча ўйинга дисквалификация қилинди;
Дунёда стрикерлар аталмиш шундай тоифа одамлар борки, улар оммавий томошалар, хусусан футбол чоғида яланғоч ҳолда майдонга югуриб чиқиб ҳамманинг диққатини тортишади. Бундайларнинг энг машҳури Англиялик Марк Робертсдир. У бу қилиғини 150 дан ортиқ ўйинларда кўрсатган. Маркнинг вояга етган уч фарзанди бор ва улар оталарининг бу ишини қўллаб-қувватлашади. Маркнинг чиқишларидан казинолардан бири ўз реклама роликларида фойдаланади ва у бунинг ортидан ҳам пул ишлайди. Шу боис ҳар сафар полиция қўлига тушганида 5000 фунт жаримани хотиржамгина тўлайди. Аммо режиссёрлар бундай инсонлар майдонга чиқиб келиши билан камерани бошқа жойга буриб қўядилар;
1998 йилда Францияда бўлиб ўтган жаҳон кубогида Ямайка терма жамоаси Аргентинага 5-0 ҳисобида ютқазди. Футболда деярли номи чиқмаган терманинг номдор Аргентина термасига ютқазишини оддийгина қабул қилса ҳам бўларди. Лекин бу Жаҳон чемпионати эди ва натижа кўпчиликни ҳайратга солди (олдинроққа кетиб айтиш мумкинки, кейинчалик Жаҳон кубокларида бу натижа бир неча бор ортда қолдирилди. Масалан: Португалия-Шимолий Корея — 7-0). Ямайканинг мағлубияти «Чайф» эстрада гуруҳини илҳомлантириб юборди ва бу гуруҳ «Аргентина- Ямайка 5-0» деган қўшиқ яратишди. Хит даражасига чиққан бу қўшиқ футболдаги натижанинг анча вақт тилдан тушмаслигига сабаб бўлди;
Швецияда бўлиб ўтаётган футбол матчларидан бири бошланиши олдидан футболчи Юханссон хотинини туғруқхонага ташлаб келди ва ўйинга киришиб кетди. Аввалига ўйин ҳеч қизимади, ҳисоб ҳам очилавермади. Кейин кимдир четдан туриб Юханссонга хотини қиз туққанлигини бақириб айтди. Футболчи бутунлай ўзгариб, жуда ажойиб ўйин кўрсатди ва рақиб дарвозасига жавобсиз тўртта тўп йўллади. Ўйиндан сўнг ҳайратда қолган ҳакам унга «Шодлик футболчини бунчалар ўзгартириб юборганини энди кўришим» деганида Юханссон «Қанақа шодлик? Мен қаҳр билан тўп сурдим. Ахир ўғлим бўлишини хоҳлагандим»-, дея жавоб берди.
