Италиянинг Сардиния ороли аэропортида сайёҳнинг юки орасида 45 кг қум ва тош аниқланди. Бу ҳақда Sardinia Post нашри хабар берди.
Таъкидланишича, Италиянинг бошқа еридан бўлган сайёҳ оролда ҳордиқ чиқариб қайтаётганда тақиқланган “сувенир”ларни олиб чиқишга уринган.
Сардинияда ноёб оқ қумни олиб чиқиш тақиқланган, чунки унинг сувенирларга оммавий равишда олиб чиқилиши оролнинг ери емирилишига хавф солади. Бундай контрабанда учун максимал қатъий жазо 6 йиллик қамоқ жазосини ташкил қилиши мумкин.
