Тошкент шаҳрида Ўзбекистон-Италия бизнес-форуми бўлиб ўтди

Жорий йилнинг 22 ноябрь куни Ломбардия ҳудуди губернатори бошчилигидаги Италия делегациясининг ташрифи доирасида Тошкент шаҳрида Ўзбекистон-Италия бизнес-форуми бўлиб ўтди.

Форумда сўзга чиққан Ўзбекистон Республикаси инвестициялар ва ташқи савдо вазири Сардор Умурзоқов ушбу даражадаги тадбирларнинг ўтказилиши инвестиция, савдо-иқтисодий ва банк соҳаларида икки томонлама ҳамкорликнинг кенг кўламли амалий масалаларини муҳокама қилиш нуқтаи назаридан муҳимлигини таъкидлаб ўтди.

“МДҲ мамлакатларининг барчаси билан эркин савдо тўғрисидаги келишувларнинг мавжудлиги ҳамда Ўзбекистоннинг қулай географик жойлашуви – ўзига хос симбиоз бўлиб, Ўзбекистонда ишлаб чиқарилган маҳсулотлар учун аҳолиси 300 миллион кишидан ортиқ катта бозорга божларсиз кириш имконини очиб беради. 

Кўплаб мамлакатлар инвесторлари ўз маҳсулотларини МДҲ мамлакатлари ва Ўзбекистонга қўшни мамлакатларга олиб кириш мақсадида Ўзбекистонда рақобатбардош ишлаб чиқаришни яратган ҳолда ана шу афзалликдан аллақачон фойдаланишмоқда”, - деди Сардор Умурзоқов.

“Жорий йилда Ўзбекистон тарихида илк марта инвестицияларнинг мамлакат ЯИМдаги ялпи улуши 38 фоиздан ортиқни ташкил этди. Бу дунёдаги энг юқори кўрсаткичлардан бири. 

Бу йили, йил якунларига кўра, тўғридан тўғри хорижий инвестициялар ўзлаштирилишининг ўсиши икки мартадан ортиқ, деярли уч марта кўп бўлишини кутяпмиз”, - дея ўз нутқини давом эттирди инвестициялар ва ташқи савдо вазири.

Ўзбекистон Италия билан ҳар томонлама ҳамкорликни янада мустаҳкамлашга алоҳида аҳамият бераётгани ва бу, ўз навбатида, жорий йилда Ҳукуматлараро ишчи гуруҳининг навбатдаги йиғилишини ўтказилиши ҳамда Ўзбекистон делегациясининг XII Евросиё иқтисодий форумида иштирок этгани орқали намоён бўлиши таъкидлаб ўтилди.

Ломбардия ҳудуди губернатори Аттилио Фонтана иқтисодий алоқаларни янада мустаҳкамлашда ҳар томонлама ёрдам кўрсатишга тайёрлигини билдирди, бу эса, Ўзбекистон-Италия муносабатларининг барча йўналишларини фаоллаштириш ва кенгайтиришга салмоқли ҳисса қўшиш имконини беради.

Ўзбекистон билан ҳамкорликка доимий қизиқиш билдираётган Ломбардия компаниялари орасида Maire Tecnimont, Mapei, Wood / Foster Wheeler, Asco Filtri, SI.SE, Marzoli, Pietro Fiorentini, Cannon / Bono, Plastics Technologies, In3act, General Med Merate ҳамда Unicredit Bank вa Banca Intesa San Paolo каби йирик банкларни ажратиб кўрсатиш мумкин.

Бизнес форумда берилган маълумотларга кўра, сўнгги 2 йил ичида Ўзбекистонда Италия капитали иштирокидаги корхоналар сони икки баробарга (46тагача) ошган. Жорий йил бошидан буён 15 та корхона ташкил этилган, Италиянинг 7 компанияси аккредитациядан ўтган. Ломбардия инвесторлари учун қишлоқ хўжалиги, автомобиль саноати ва бутловчи қисмларни ишлаб чиқариш, мева-сабзавот маҳсулотларни қайта ишлаш, кимё тармоғи, нефт ва газ саноати, тўқимачилик, ипак ва чарм-пойабзал саноати, қурилиш материаллари ишлаб чиқариш соҳаси, фармацевтика, металлургия, шунингдек бошқа йўналишларда муҳим истиқболлар қайд этилди.

Шунингдек, форум давомида, мавжуд савдо-иқтисодий шароитлар ва бозор хусусиятларини ҳисобга олган ҳолда, бугунги кунда, ўзаро савдо ҳажмини йилига 500 миллион долларгача ошириш имконияти мавжудлиги маълум қилинди.

Маълумот учун: Ломбардия - Италиянинг шимолий қисмидаги маъмурий ҳудуд (12 та маъмурий бўлинма ва 1507 та коммунани қамраб олган). Бу ерда мамлакат аҳолисининг 1/6 қисми (10 миллион нафар киши) истиқомат қилади. Бу ҳолат уни энг зич жойлашган ҳудудлардан бирига айлантиради. Ломбардия ҳудуди аҳолиси баъзи Европа давлатлари, масалан Австрия, Швейцария ва Норвегия аҳолисидан кўпдир. Ҳозирги босқичда, Италиянинг энг фаол иқтисодий ҳудудларидан бири бўлган Ломбардиянинг ялпи ҳудудий маҳсулоти жами Италия ялпи ички маҳсулотининг 20 фоизини – 400 миллиард еврони ташкил этади.