Эронда қасос олишнинг 13 хил варианти тайёрлаб қўйилгани маълум қилинди

Фото: AP Photo/Ikram Suri

Эрон олий миллий хавфсизлик кенгаши америкалик ҳарбийлар томонидан "Ал-Қудс" бўлинмаси қўмондони Қосим Сулаймонийнинг ўлдирилиши учун АҚШдан қасос олишнинг 13 хил йўлини тайёрлади. Бу ҳақда миллий хавфсизлик кенгаши котиби Али Шамхоний маълум қилди.

"Бугунги кунда миллий хавфсизликда қасос олишнинг 13 хил йўли тақдим этилди", - дея унинг сўзларидан иқтибос келтирмоқда Fars агентлиги.

Шамхонийнинг қўшимча қилишича, "уларнинг энг кичиги ҳам АҚШ учун тарихий даҳшатга айланади".

Унинг сўзларига кўра, "америкаликлар Эроннинг жавоби олдида ожиз эканликларини билишади".

"Агарда АҚШ кучлари минтақани ўзлари тарк этишни истамаса, биз уларни бунга мажбур қиламиз", - деди Эрон хавфсизлик кенгаши котиби.

Эрон ва АҚШ ўртасидаги муносабатлар Бағдод аэропортида Эрон генерали Қосим Сулаймоний америкалик ҳарбийлар томонидан ўлдирилганидан сўнг кескинлашди. Теҳрон Вашингтондан бунинг учун қасос олишини билдирди.

Тайёрлаган Дилшод Аскаров

#АҚШ #Эрон

Эрон ташқи сиёсати бунёдкори, Яқин Шарқ бўйича бош стратеги, Эрон Ислом инқилоби муҳофазаси корпуси таркибидаги «Кудс» махсус бўлинмаси қўмондони Қосим Сулаймоний Бағдоддаги аэропортда АҚШ президенти Дональд Трамп фармойишига биноан ўлдирилди.