Ўзбекистон ва Россия шаҳарлари ўртасида енгил автомобилда қатнайдиган ўнлаб ҳайдовчилар 13 январь куни Олий Мажлис Қонунчилик палатаси биноси олдида тўпланишди.
Kun.uz мухбирининг хабар беришича, республиканинг турли вилоятларидан келган ҳайдовчилар 1 январдан кучга кирган янги божхона тартибидан шикоят қилишмоқда.
Янги тартибга кўра, эндиликда жисмоний шахслар шахсий эҳтиёжлари учун чет элдан олиб келаётган товари миқдори божсиз олиб кириш меъёрларидан ортса, божлар соддалаштирилган тартибда ундириляпти.
Яъни божхона божи, ҚҚС ва акциз солиғи ўрнига ягона божхона тўлови жорий этилди. Тўлов ставкаси товарнинг божхона қийматидан 30 фоиз, лекин бир килограми учун 3 доллардан кам бўлмаган миқдорда белгиланган.
Ҳайдовчилар нимадан норози?
Ҳайдовчилар жорий этилган бож миқдори қимматлигини айтиб, уни пасайтиришни илтимос қилишмоқда.
«Ўзбекистонга кириб келишда 1 кг юк учун тўланадиган 3 доллар Россияда ишлайдиган юртдошларимизга ва Россия-Ўзбекистон йўналишида қатнайдиган ҳайдовчиларга оғирлик қиляпти.
Россияда ишлайдиган яқинларимизнинг ойлиги 30-35 минг рубль атрофида бўлса, ундан ойлик патент тўлови ва квартирасига тўласа, юкларини олиб келишимиз учун бизга килосига 120 рублдан (2 долларга яқин) тўлов қилса, фуқароларимизга нима қолади?
Оила боқиш учун 4-5 кунлаб, уйқусизлик азоби билан Қорақалпоғистон чегарасигача етиб келамиз. Шу 4-5 кун ичида Қозоғистон билан чегарадаги божхонада бир кунлаб навбатда қолиб кетамиз. Божхонага киришда «Юкларимиз учун қанча пул олишаркан?» деб юрак ҳовучлаб ўтирамиз.
Машинасининг тиркамаси борлар 10 миллион сўмдан бошлаб тортишиб-тортишиб, 4-5 миллионгача туширишади. Енгил машина устидаги багажи учун 1,5-2 миллион атрофида пул тўланади.
«Агар пулни тўламасанг, қора рўйхатга киритамиз. Кейин Ўзбекистондан чиқа олмайсан», деб дағдаға ҳам қилишади», – дея расмийларга илтимосномасини ўқиб берди йиғилганлардан бири.
