Россия Премьер-лигасидаги легионерларимиз сони яна бир нафарга кўпайиши мумкин.
Гап шундаки, Ўзбекистон олимпия ва миллий жамоасига номзод футболчи Остон Урунов айни дамда Россиянинг «Уфа» клуби сафига бориб қўшилган. «Уфа» клуби матбуот хизматининг «твиттер»даги расмий саҳифасидаги фоторепортажида ўзбекистонлик футболчи Остон Урунов ҳам қайд этилган. 19 ёшли яримҳимоячи уфаликлар билан бирга жамоанинг Кипрдаги ўқув-машғулот йиғинида иштирок этмоқда.
Маълумот учун, Остон Урунов 2019 йилги мавсумда «Навбаҳор» ва «Локомотив» клублари сафида ўтказиб, Суперлигада 25 ўйинда 3та голга муаллифлик қилган.
