Эрдўған Ҳафтарнинг тажовузкорона сиёсатини тўхтатишга чақирди

Фото: РИА Новости

Туркия президенти Ражаб Тоййиб Эрдўған Ливияда тинчлик ўрнатиш учун сулҳ тузилиши ва Ливия миллий армияси қўмондони Халифа Ҳафтарнинг тажовузкорона сиёсатини тўхтатиш кераклигини айтди. У бу ҳақда Берлинда Ливия бўйича ўтказиладиган анжуман арафасида Россия президенти Владимир Путин билан учрашуви чоғида фикр билдирди.

"Биз жаноб Сарожни (Ливия Миллий келишув ҳукумати раҳбари) Москвага келишга кўндириш учун анча саъй-ҳаракатларни амалга оширдик. У ўз вазифасини бажарди. Натижада Миллий келишув ҳукумати барча кутганлари бажарилмаган бўлса ҳам келишув имзолади. Ҳафтар келишувни имзоламади, у тинчлик тарафдори эмаслигини, масалани ҳарбий йўл билан ҳал қилиш ниятида эканлигини кўрсатди", - деди Эрдўған.

"Ливияда тинчлик-хотиржамлик ўрнатилиши учун Берлин конференцияси сулҳ тузилишини таъминлаши ҳамда масалани сиёсий йўл билан ҳал қилиши керак. Ҳафтарнинг тажовузкорона мавқеига чек қўйиш зарур", - деб таъкидлади Туркия президенти.

Аввалроқ Миллий келишув ҳукумати раҳбари Фоиз Сарож Халифа Ҳафтар ўз ҳужумини тўхтатмаса, халқаро ҳамжамият Ливиянинг тинч аҳолисини ҳимоялаш бўйича ҳаракатларни амалга ошириши лозимлигини айтганди.

#Ливия #Ражаб Тоййиб Эрдўған

2011 йилдан буён фуқаролик уруши ҳолатида бўлган Ливияда вазият янада чигаллашмоқда. Туркия Ливия билан ҳарбий соҳадаги ҳамкорлик асосида Африка шимолига ўз ҳарбийларини йўлламоқда.