Башар Асад аксарият араб давлатлари Сурия билан алоқаларни тиклаганини маълум қилди 

Сурия президенти Башар Асад аксарият араб давлатлари Сурия билан алоқаларни тиклаганини айтди. У, шунингдек, Туркия билан алоқанинг тикланиши шартини маълум қилди. 

Сурия раҳбари булар ҳақида “Россия 24” телеканалига берган интервьюсида айтиб ўтди. Унинг таъкидлашича, аксарият араб давлатлари Сурия билан алоқани тиклади, бироқ буни Ғарб босимидан қўрқиб, овозасиз амалга оширди.

“Аксарият араб давлатлари Сурия билан муносабатларни тиклади, бироқ босимдан қўрқиб, буни овозасиз қилди. Бу давлатлар Сурияга қўллаб-қувватлов билдирди ва террорчилик устидан ғалаба қозонишимизни тилаб қолди. Бироқ ғарб босими, жумладан АҚШники, бу давлатларни, айниқса Форс кўрфази давлатларини, биздан ўзини узоқроқ тутишга ва Сурияда ўз элчихоналарини очмасликка мажбур қилди”, деб айтган Асад.  

Таъкидлаб ўтиш жоиз, 4 март куни Ливия муваққат ҳукумати элчихонаси 2012 йилдан кейин илк бор Дамашқда ўз ишини бошлади. Бунгача, 2018 йил декабрда 6 йиллик танаффусдан кейин Дамашқда БАА ва Баҳрайн ўз элчихоналари ишини тиклаган.

Умуман олганда, Сурияда 2011 йилда бошланган ихтилофдан кейин 30 дан кўпроқ давлат, жумладан АҚШ, Саудия Арабистони ва Европа Иттифоқи ваколотхонаси Суриядаги ўз элчихоналарини ёпган ёки дипломатик персоналини Ливан пойтахти Байрутга кўчирган. 

Шунингдек, Асад ўз интервьюсида Туркия билан алоқаларнинг тикланишига тўхталиб ўтган. Унинг таъкидлашича, Сурия ҳукумати Туркия президенти Ражаб Тоййиб Эрдўған террорчиларни қўллаб-қувватлашни тўхтатса, Анқара билан муносабатларни тиклашга тайёр. 

Сурия президентининг айтишича, охирги икки йил ичида Сурия ва Туркия махсус хизматлари вакиллари ўртасида учрашувлар бўлиб ўтган.

“Бизнинг Россия билан умумий мақсадимиз – Туркияни террорчиларни қўллаб-қувватлашдан нарилатиш ва уни ўзининг асл позициясига қайтаришдир. Бироқ Эрдўған террорчиларни қўллаб-қувватлар экан, биз бундай натижага кела олмаймиз. Террорчиларни қўллаб-қувватлашдан қутулиш керак, ўшанда вазият аввалги ҳолига қайтади”, деб таъкидлаб ўтган Асад. Унинг таъкидлашича, икки давлат халқлари орасида адоват йўқ, кескинлик эса сиёсий манфаатлар билан боғланган.

Сурия ва Туркия дипломатик алоқаларни 2012 йилда узган.