Италияда 16 миллион киши карантинга олинди. Коронавирус бўйича сўнгги маълумотлар
|17:25 / 08.03.202077 88413 мин
Италия ҳукумати мамлакат шимолидаги барча вилоятларни коронавирус авж олиши туфайли карантин ҳолатига ўтказди. Бу регионларга кириш ва у ердан чиқиш тўхтатилган. Бу ҳудудда камида 16 миллионга яқин киши карантинда қолмоқда.
Фото: AP PhotoФото: AP Photo
Италия бош вазири Жузеппе Конте янги чеклов чоралари ҳақида эълон қилди.
Унга кўра, Италияда 8 мартдан бошлаб Ломбардияга, шунингдек, яна 14та провинцияга кириш ва чиқиш тўхтатилади. Ёпилган провинциялар: Парма, Пьяченца, Римини, Режо-нель-Эмилия, Модена, Пезаро, Урбино, Падуя, Тревизо, Алессандрия, Вербано-Кузио-Оссола, Новара, Верчелли ва Асти. Зарурат туғилса, бу ҳудудлар беморларни ўзаро қайта тақсимлаши кўзда тутилган.
Сайёҳлар орасида машҳур бўлган Милан ва Венеция шаҳарлари карантин ҳудудида қолган.
Карантинга олинган провинцияларга кириш ва улардан чиқишга фақат фавқулодда ҳолатлардагина рухсат берилиши мумкин.
Контенинг сўзларига кўра, гап фақат бу ҳудудларга кириш ва чиқишни чеклаш ҳақида кетмайди, карантин ҳудудларида ҳам алоҳида чекловлар жорий этилади. Музейлар, тоғ-чанғи курортлари, бассейнлар, спортзаллар, тунги клублар ҳамда бошқа оммавий ва маданий тадбирлар ўтказиладиган бошқа жойлар ёпилади. Мактаблар ва университетлар аллақачон ёпилган, диний маросимлар тўхтатилган.
Ресторан ва барлар ҳозирча ишлашда давом этиши мумкин, аммо бир шарт билан - мижозлар бир-биридан хавфсиз масофада (камида бир метр) жойлаштириш таъминланиши керак. Карантин ҳудудида қолган одамларга имкон қадар кўчага чиқмаслик тавсия этилмоқда. Карантин режимини бузганлар уч ойгача қамалиши мумкин.
Карантин ҳудудидаги А Серия учрашувлари ва бошқа йирик турнирлар томошабинларсиз ўтказилади.
Чекловлар камида 3 апрелга қадар амалда бўлади. Ломбардияда 10 миллионга яқин киши яшайди. Карантин ҳудуди жами 16 миллион кишини қамраб олади.
Умумий эҳтиёт чоралари бутун Италия бўйлаб кўрилмоқда: музейлар ва букмекерлик идоралари ёпилмоқда, оммавий тадбирлар, хусусан, фильмлар, спектакллар намойишлари ва спорт мусобақалари бекор қилинмоқда.
Италияда ўлимлар сони кескин ошган
Италия Европада коронавирусдан энг кўп зарар кўрган мамлакат бўлиб турибди. Сўнгги маълумотларга кўра, Италияда 5900га яқин кишида вирус аниқланган - сўнгги бир кун ичида 1200дан ортиқ янги ҳолат қайд этилди, қурбонлар сони 233 нафарга етган - сўнгги бир кун ичида 50 киши вафот этган.
Мавзуга оид
EPA-EFE/ALESSANDRO DI MARCO
Италияда қатъий чоралар жорий этилиши вирус билан курашда тактика жиддий ўзгарганини кўрсатади, бу мамлакатдаги ҳолат Европанинг бошқа давлатлари учун сабоқ бўлмоқда.
Италия ҳукумати жума куниёқ яна 20 минг нафар шифокор ва ҳамширалар коронавирусга қарши курашга жалб этилганини маълум қилганди.
«Агар фуқароларимиз масъулиятни ҳис қилишса ва ҳаёт тарзини ўзгартиришса, биз бу жангда ғолиб бўламиз», - деганди Фуқаролик мудофааси хизмати раҳбари Анжело Боррелли.
Италияда вирус қурбони бўлаётганларнинг ўртача ёши 81 ёшни ташкил қилмоқда ва улар асосан эркаклардир. Шунингдек, вирусдан вафот этганларнинг 80 фоизи вирусга чалингунча ҳам бошқа касалликлар билан оғриган.
Италиянинг Intesa Sanpaolo банки коронавирусга қарши курашга 100 млн еврони хайрия қилган, шунингдек, эпидемиядан жабрланган компанияларга жами 5 млрд евро миқдорида кредитлар ажратилган. Ҳукумат коронавирус эпидемияси мамлакат иқтисодиётида рецессияга олиб келишидан ташвишланмоқда.
АҚШдаги вазият
Нью-Йорк губернатори Эндрю Куомо штатда фавқулодда ҳолат эълон қилди - сўнгги бир кунда коронавирусдан зарарланиш ҳолатлари қарийб икки баравар ошди. Айни вақтда штатда 89 кишида коронавирус юқиш ҳолати тасдиқланган.
Матбуот анжуманида чиқиш қилган губернатор штатдаги тиббиёт ходимлари сўнгги кунларда вирусни аниқлаш учун текширувларни кучайтирганини маълум қилди.
«Оммавий равишда карантин ҳолати инфекция тарқалишини секинлаштиришнинг энг яхши чораси эканига ҳеч қандай шубҳа йўқ», - дея қайд этган Куомо.
АҚШда айни вақтда вирусдан зарарланганлар сони 444 нафарга етди, 19 киши ҳалок бўлган.
Жамоатчилик билан алоқалар бўйича Америка—Исроил қўмитасининг конференциясида қатнашган икки кишида коронавирус инфекцияси аниқланди. 1-3 март кунлари Вашингтонда бўлиб ўтган конференцияда АҚШ вице-президенти Майк Пенс, АҚШ Давлат департаменти раҳбари Майк Помпео, республикачи сенатор Митч Макконнелл, миллиардер Майкл Блумберг ва ўнлаб конгрессменлар қатнашган эди. Форумга жами 18 минг киши ташриф буюрганди.
Калифорния қирғоқлари яқинида карантинга олинган «Гранд принцесс» круиз лайнерида 3,5 минг киши изоляция қилинган, ҳозирча улардан 21 киши вирус юқтиргани аниқланди. Кема йўловчиларнинг барчасини текшириш учун кўп вақт талаб этилади.
Вашингтон штатида жами 70 кишида вирус аниқланган. Штат маркази Сиэтл шаҳридаги қариялар уйида бирданига 9 киши коронавирус туфайли вафот этди.
Род-Айленд штатидаги мактаб ўқувчилари Италияга бориб қайтишганидан кейин улардан уч нафарида Covid-19 аниқланди, ҳозирда штатда 200га яқин киши карантинга жойлаштирилган.
Британияда иккинчи ўлим
Getty Images
Британияда шанба куни коронавирусдан зарарланиш билан боғлиқ яна 46та ҳолат аниқланди - беморлар сони 163 нафарга етди.
Шунингдек, Британияда яна бир киши вирус келтириб чиқарган касаллик қурбони бўлгани тасдиқланди: жума куни Бакинҳемшир графлигидаги Милтон-Кинс шаҳридаги шифохонада 82 ёшли эркак вафот этганди - таҳлиллар натижалари унинг ўлимига коронавирус сабаб бўлганини тасдиқлади.
Унга қараган тиббиёт ходимлари карантинга жойлаштирилган.
Пайшанба куни Рединг шаҳрида ушбу инфекцияга чалинган 70 ёшли аёл вафот этганди - унинг сурункали касаллиги ҳам бўлган.
British Airways авиакомпанияси икки ходимида коронавирус аниқланганини, улар изоляция қилинганини маълум қилган.
Жаҳондаги вазият
Жаҳон соғлиқни сақлаш ташкилоти маълумотига кўра, янги коронавирус келтириб чиқарган Covid-19 эпидемияси жаҳоннинг жами 103 давлатида қайд этилган. Сўнгги кунларда Сербия, Словакия, Ватикан, Парагвай, Перу, Камерун, Молдова, Латвия, Колумбия, Бутан, Непал, Шри-Ланка, Лихтенштейн, Монако, Гибралтар ва Тогода ҳам янги ҳолатлар тасдиқланди. Нью-Йоркда фавқулодда ҳолат эълон қилинган.
Бутун дунёда вирусдан зарарланганлар сони 106 206 нафарни ташкил қилмоқда, улардан 25 мингдан ортиғи Хитойдан ташқарида. Жами 3600 ўлим ҳолати қайд этилган, шундан 3097таси - Хитойда.
Жума куни Ватикан ўз ҳудудида коронавирусга чалинишнинг илк ҳолатини тасдиқлади. Беморнинг шахси очиқланмаган, фақат у Ватикандаги поликлиникага мурожаат қилгани маълум. Ватикан Соғлиқни сақлаш ва гигиена бошқармаси дезинфекция қилиш чора-тадбирларини амалга оширади.
Фото: Getty Images
Рим папаси Франциск Ватикандаги Пётр майдонидаги якшанба кунги ибодат одатдаги тартибда ўтказилмаслиги, бу тадбир инфекция тарқалиши хавфининг олдини олиш учун бекор қилингани ҳақида маълум қилди. 15 март кунига қадар бошқа маросимлар ҳам онлайн-режимда ўтказилиши белгиланган. Понтификнинг ўзи сўнгги кунларда шамоллаб қолган, аммо унда коронавирус аниқланмаган.
Хитойда сўнгги ҳафтада биринчи марта бир кунда вирусдан зарарланганлар сони 100 нафардан кам бўлди - 7 март куни 45 кишида вирус қайд этилган, айни вақтда мамлакатдаги беморлар сони 80 696 нафар. Сўнгги бир кунда 27та ўлим ҳолати қайд этилди ва жами қурбонлар сони 3097 нафарга етди.
Францияда коронавирусдан зарарланганлар сони кескин ўсмоқда - сўнгги бир кун ичида яна 336 кишида вирус аниқланди ва вирусдан зарарланганлар сони 949 нафарга етди. Бу мамлакатда 16 киши коронавирусдан вафот этган, яна 45 киши реанимация бўлимларида қолмоқда. Мамлакатда 150та мактаб ёпилган. Француз ҳукумати 100 мл идишдаги қўл учун гелга максимал нарх белгилаган - 3 евро. Бу нарх 31 майга қадар амалда бўлади.
Аҳолиси 100 миллиондан ортиқ бўлган Филиппинда соғлиқни сақлаш соҳасида фавқулодда вазият эълон қилишга тайёргарлик кўрилмоқда. Президент Родриго Дутерте шанба куни бу ҳақдаги қарорни маъқуллаган. Мамлакатда ҳозирча фақат 6 кишида вирус аниқланган (1 киши вафот этган), аммо ҳукумат инфекция жамоат жойларида тез тарқалиши мумкинлигидан хавотирга тушмоқда.
Эронда сўнгги маълумотларга кўра, вирусдан зарарланганлар сони 6 мингга яқинлашди ва қурбонлар сони 145 нафарга етди. Бу мамлакатда сўнгги кунда 21 киши ҳалок бўлди. Лекин рақамлар янада йириклашиши мумкин. Эрон парламентининг яна бир аъзоси вирус қурбонига айланган.
Сербияда Covid-19 коронавирусидан зарарланишнинг илк ҳолати тасдиқланди: Шу кунларда Венгрия пойтахти Будапешдан қайтган суботицалик 43 ёшли эркак шифохонанинг алоҳида палатасига жойлаштирилган.
Словакияда бош вазир илк ҳолат ҳақида эълон қилди, бу бемор - 52 ёшли эркак яқин орада мамлакатдан ташқарига чиқмаган, аммо унинг ўғли Венецияда бўлиб қайтган.
Чехияда 12 бемор қайд этилган, уларнинг барчаси Италия шимолига сафарлар билан боғлиқ.
Нидерландияда коронавирусдан илк ўлим ҳолати қайд этилди: Роттердам шифохонасида 86 ёшли эркак оламдан ўтди. Бу мамлакатда жами 128 кишида Covid-19 аниқланган.
Миср соғлиқни сақлаш вазирлиги жума куни Нил дарёси орқали Луксордан Асуан шаҳрига келган кема йўловчиларининг 12 нафарида вирус аниқлади, аммо уларнинг ҳеч бирида ташқи белгилар бўлмаган. Айни вақтда мамлакатда 48 кишида вирусдан зарарланиш ҳолати тасдиқланган
Шанба куни Вьетнамда яна 4 кишида вирус аниқланди ва мамлакатда вирусдан зарарланганлар сони 21 нафарга етди.
Россияда янги беморлар
Шанба куни яна 4 кишида коронавирус қайд этилди - Петербург ва Липецкда. Жума куни 5та ҳолат қайд этилганди - Москвада 4 ва Нижний Новгородда - 1.
Сўнгги маълумотларга кўра, Россияда коронавирус инфекциясига чалиниш билан боғлиқ жами 15 ҳолат рўйхатга олинган, беморларнинг иккиси ХХР фуқароси, 12 нафари Италиядан қайтган Россия фуқаролари, яна бири италиялик талаба. Бундан ташқари, Япониядаги «Diamond Princess» круиз лайнеридан эвакуация қилинган уч нафар россиялик тиббий назорат остида бўлиб турибди.
Москва мэри Сергей Собянин пайшанба куни кечқурун коронавирус тарқалиши олдини олишга қаратилган қатъий чоралар ҳақидаги фармонини имзолаганди. Унга кўра, шаҳардаги тиббий муассасалар, жамоат транспортлари ва шаҳардаги бошқа хизматлар юқори шайлик режимига ўтказилган.
ЖССТ нима демоқда?
Жаҳон соғлиқни сақлаш ташкилоти (ЖССТ) бош директори Тедрос Адҳаном Гебрейесус жаҳон мамлакатларига мурожаат қилди.
Тедрос Адҳаном Гебрейесус / Anadolu
«Биз давлатларни ҳар бир ҳолатни топишга, текширишга, изоляция қилишга, даволашга ва кузатишга чақирамиз», деди у ЖССТнинг Женевадаги штаб-квартирасида ўтказилган матбуот анжуманида.
Жабрланувчилар сони 100 мингдан ошганини таъкидлаган Гебрейесус вирусдан зарарланиш ҳолатлари тезлик билан кўпаяётгани туфайли ташкилот барча мамлакатларга «чеклов»ларни биринчи ўринга қўйишни маслаҳат беришини билдирди.
«Эпидемияни секинлаштириш ҳаётни тежашга ёрдам беради, шунингдек, тайёргарлик, тадқиқот ва ишлаб чиқариш учун вақтни тежайди (вакцинани топиш учун). Агар биз касаллик тарқалишини бир кун секинлаштира олсак, демак, касалхоналарга ушбу ишни якунлаш учун яна бир кун берилган бўлади. Ўтган ой бу масаласида 400 нафар олим билан учрашув ўтказдик. Биз, шунингдек, қочқинлар ва ички кўчишда бўлган одамлар, ҳақларидан маҳрум жамоаларга мўлжалланган дастурларни амалга ошириш учун тадқиқот протоколларини ишлаб чиқмоқдамиз», деди у.
Гебрейесус ҳозиргача ЖССТга 40та диагностик тестни кўриб чиқиш ва тасдиқлаш учун аризалар келиб тушгани, 20та вакцина ишлаб чиқилаётгани ва муолажа учун кўплаб клиник тадқиқотлар олиб борилаётганини маълум қилди.
Гебрейесус шу ҳафта бошида ўз ишчилари ва мижозларини қандай ҳимоя қилиш мумкинлиши ҳақида глобал компаниялар билан алоқада бўлганлигини ҳам қўшимча қилди.
