Koronavirus: Moskvada yuqori shaylik rejimi, Sankt-Peterburgda talabalar karantinda

Moskva meri Sergey Sobyanin Rossiya poytaxtida koronavirus tarqalishining oldini olishga qaratilgan yangi choralar haqida e'lon qildi. Instruksiyada xorijdan qaytib kelganlar birinchi navbatda nimalar qilishi va qanday holatlarda o‘zini izolyatsiya qilishi zarurligi ko‘rsatilgan.

Bu choralar shaharda koronavirus tarqalishi xavfi sabab yuqori shaylik rejimi joriy etilgani bilan bog‘liq. Ko‘riladigan choralar ro‘yxati Moskva meriyasi saytida joylashtirilgan.

Farmonda ko‘rsatilishicha, Xitoy, Janubiy Koreya, Italiya, Eron, Fransiya, Germaniya va Ispaniyaga borib qaytgan fuqarolar avtomatik ravishda 14 kun davomida o‘zlarini uy sharoitida mustaqil izolyatsiya qilishi kerak — ular ishga, o‘qishga va jamoat joylariga borishdan tiyilishlari lozim.

Koronavirus tarqalgan boshqa davlatlardan qaytib kelganlar ham bu haqda hukumatni xabardor qilishi kerak. Bunday fuqarolar Rossiyaga qaytib kelganliklari haqida xabar berishi va o‘zlarining telefon raqamlarini qoldirishlari lozim. 

Agar «ilk respirator simptomlar» kuzatilsa, shifokorga borish kerak emas, balki uyda turib tibbiy yordamga murojaat qilish zarur bo‘ladi. Agar shifokor izolyatsiya rejimi tayinlasa, unga amal qilish kerak.

Shuningdek, ish beruvchilarga o‘z xodimlarining tana haroratini ish joyida o‘lchash, kimda yuqori harorat aniqlansa, ishdan chetlatish chorasini ko‘rish majburiyati yuklangan. Ish beruvchi zarur holatda xodimlariga uy sharoitida mustaqil izolyatsiya rejimini ta'minlashga yordam ko‘rsatadi.

Shu bilan birgalikda, Sobyaninning farmoni matnida, ko‘rsatmalarga amal qilmaydigan fuqarolar va ish beruvchilar qanday javobgarlikka tortilishi borasida aniqlik kiritilmagan, shuningdek, ushbu farmon e'lon qilinishidan avvalroq infeksiya o‘choqlaridan qaytganlar qanday bunga rioya qilishlari kerakligi ham eslab o‘tilmagan

Sergey Sobyaninning saytida yozilishicha, Moskvada ayni vaqtda umumiy vaziyat nisbatan tinch.

Rossiyaning Sankt-Peterburg shahrida esa Mechnikov nomidagi davlat shimoli-g‘arbiy tibbiyot universitetining 700 nafardan ortiq talabasi karantinga olindi. Bunga italiyalik talabada koronavirus kuzatilgani sabab bo‘lgan.

Italiyalik talabaning harorati ko‘tarilgach, tezkor choralar ko‘rilgan va u Botkin nomidagi kasalxonaga joylashtirilgan.

Ayni vaqtda karantinga olingan hudud ichkarisiga odamlar kiritilmayapti.

Italiyalik talaba bilan birga yotoqxonada yashagan boshqa yoshlar ham karantinga olingan. Talabalar yotoqxonalarida yashovchilar OTM talabalarining 20 foiz qismini tashkil etadi.

Rikardo ismli talaba 29 fevralda Sankt-Peterburgga kelgandi. Aeroportda uning tana harorati o‘lchanganida isitmasi bo‘lmagan. Talabadagi kasallik alomatlari oradan bir nech kun o‘tgach ko‘zga tashlangan, shundan so‘ng u va uni kutib olgan boshqa talabalar kasalxonaga olib ketib tekshirilgan.

Peterburg iqtisodiy forumi tashkilotchilari koronavirus tarqalishi xavfi tufayli 3-6 iyun kunlariga belgilangan iqtisodiy forumni bekor qildi. 1997 yildan buyon har yili o‘tkazib kelinayotgan forumga so‘nggi yillarda har yili 10 mingdan ortiq kishi, jumladan, turli davlatlardan yuqori martabali siyosatchilar tashrif buyurishi kuzatilayotgandi.

Zelenskiyning tashrifi
Ukraina prezidenti Vladimir Zelenskiy Poltava oblastidagi Novix Sanjar (Novі Sanjari) posyolkasiga keldi va Xitoydan evakuatsiya qilinib, karantinga joylashtirilgan 72 kishi bilan uchrashdi. Payshanba kuni bu yerdagi sanatoriyada 14 kunlik karantin muddati tugadi.

Prezident ofisi saytida aytilishicha, bu davr mobaynida evakuatsiya qilinganlarning hech birida koronavirus aniqlanmagan va ular endi oddiy hayot tarziga qaytishlari mumkin.

21 fevral kuni Novix Sanjar aholisi evakuatsiya qilinganlar bu hududga joylashtirilishiga qarshi namoyish o‘tkazgan va hatto karantinga olib ketilayotgan ukrainlar o‘tirgan avtobuslar yo‘lini to‘sishgandi. Ammo keyinroq, mahalliy nashrlarning yozishicha, odamlar sanatoriyaga o‘yinchoqlar va shirinliklar keltira boshlashgan.

• 6 mart kuni holatiga ko‘ra butun dunyoda koronavirus infeksiyasiga chalinganlar soni 98 467 nafarni tashkil etmoqda. Vafot etganlar soni 3401 nafar, 55 189 kishi sog‘aygan. Virus jahonning 88 mamlakatida qayd etilgan.

AQSh: yana bir kruiz layner karantine, Kaliforniyada favqulodda holat
Kaliforniya qirg‘oqlari yaqinida «Grand prinsess» kruiz layneri karantinga olindi, avvalgi reys yo‘lovchilaridan biri - 21 fevral kuni San-Fransiskoda kemadan tushgan shaxsda koronavirus aniqlangan.

71 yoshli erkak chorshanba kuni Sakramentodagi klinikada vafot etdi. Xabar qilishlaricha, u koronavirusdan zararlanishidan oldin boshqa kasali bo‘lgan.

Bu Kaliforniyada Covid-19 xastaligidan ilk o‘lim holati bo‘ldi, ayni vaqtda AQShda virus qurbonlari soni o‘n bir kishini tashkil etmoqda. Bu ma'lumotdan keyin Kaliforniya gubernatori Gevin Nyusom shtatda favqulodda holat e'lon qildi.

«Grand prinsess» kruiz layneri fevral oyida Yaponiyada uch haftaga yaqin vaqt davomida karantin holatida tutib turilgan «Daymond prinsess» seriyasiga mansub bo‘lib, u ham Carnival kompaniyasiga tegishli hisoblanadi. Bu kema 21 fevral kuni Meksikadan qaytgan, ko‘p o‘tmay Havayiga yo‘l olgandi.

Avvalgi kruiz yo‘lovchilaridan birida Covid-19 aniqlangach, bu reys to‘xtatilgan, kema Kaliforniya qirg‘oqlari yaqinida ochiq suvda karantin holatiga o‘tkazilgan

Layner bortida ikkita kruizga ham - Meksika va Havayiga chipta olgan 62 kishi bor. Bu yo‘lovchilar o‘z kayutalarida izolyatsiya qilingan, qolgan yo‘lovchilar esa kema bo‘ylab erkin harakatlanishlari mumkin.

Mark Peys va uning rafiqasi Bet CNN telekanaliga yo‘lovchilarning ko‘pchilik qismi uchun yagona karantin chorasi - bufetda tarelkani yuvilmagan qo‘l bilan ushlamaslik va o‘ziga ovqat solmaslik ekani haqida aytishgan.

Mark Peysning so‘zlariga ko‘ra, u kruizga otlanar ekan, o‘zi bilan leptop va ikki haftaga o‘zi hamda rafiqasi uchun yetarli bo‘lgan dori-darmonlar olgan - u karantin ehtimolini hisobga olgan.

Tibbiyot xodimlari «Grand prinsess»ning 11 yo‘lovchisi va ekipajning 10 a'zosini koronavirus yuqtirishda gumonlamoqda.

AQShda virus bilan bog‘liq vaziyat
Bungacha koronavirus keltirib chiqargan Covid-19 pnevmoniyasi oqibatida 10 nafar amerikalik vafot etgan, bu o‘limlarning barchasi mamlakat shimoli-g‘arbidagi Vashington shtatida qayd etilgandi.

Mamlakatning 16ta shtatida jami 150 kishi virusdan zararlangan, ularning aksari Vashington, Texas va Nebraska shtatlariga to‘g‘ri keladi. Uchta shtatda favqulodda holat joriy etilgan: Vashington, Florida va Kaliforniya.

Federal hukumat mamlakatga so‘nggi 14 kun mobaynida Xitoy hududida bo‘lgan xorijliklar kirishini taqiqlagan.

Prezident Donald Tramp tomonidan koronavirus tarqalishiga qarshi kurashga mas'ul etib tayinlangan vitse-prezident Mayk Pens chorshanba kuni mamlakatning har bir fuqarosi koronavirusni aniqlash testidan o‘tish imkoniyatiga ega bo‘lishi kerakligini ta'kidladi. Shu munosabat bilan AQSh Kasalliklarni nazorat qilish va profilaktika markazi qator byurokratik cheklovlarni bekor qildi - bundan maqsad tadqiqotlar o‘tkazish jarayonini tezlashtirishdir.

Oq uy ma'muriyatini tanqid qiluvchilar laboratoriya materiallari va tibbiy xodimlar yetarli emasligi, shuningdek, tekshiruvlar uchun yuqori haq olinishi (ming dollargacha) holatlariga e'tibor qaratishgan. 

Vakillar palatasi chorshanba kuni koronavirusga qarshi kurashdagi favquloddagi choralar uchun 8,3 mlrd dollar mablag‘ ajratish uchun ovoz berishdi.

United Airlines va Delta aviakompaniyalari talab pasaygani tufayli ichki reyslarni qisqartirgan.

Koronavirus: jahonda nimalar bo‘lmoqda?

• Buyuk Britaniyada ilk o‘lim holati qayd etildi. Berkshir grafligidagi shifoxonada avvalroq boshqa kasalligi ham bo‘lgan keksa bemor koronavirusga chalinishi oqibatida vafot etgan. Mutaxassislarning hisoblashicha, u Buyuk Britaniya hududida koronavirus yuqtirgan. Ayni vaqtda qirollik hududida 115 kishida koronavirus qayd etilgan.
• So‘nggi bir kun ichida Xitoyda virusdan zararlanishning 143ta yangi holati aniqlangan, 31 kishi vafot etgan.
• Janubiy Koreyada payshanba kuni yana 518 kishida kasallik aniqlangan va ayni vaqtda mamlakatda virusdan zararlanganlar soni 6284 nafarga yetgan. 42 kishi virus qurboniga aylangan.
• Avstraliya so‘nggi ikki hafta mobaynida Janubiy Koreya hududida bo‘lgan xorijliklar uchun ham chegarani yopdi. Yashil qit'ada bugungi kunga kelib virusdan zararlanishning 59ta holati va ikki o‘lim holati qayd etilgan.
• Italiyada mamlakatdagi barcha maktablar 10 kun muddatga yopilgan. Apennin yarimorolida virusdan zararlanganlar soni 3858 nafarga yetgan, 5 mart kuni yana 41 kishi virus qurboni bo‘lgan - bu mamlakatda bugunga qadar jami 148 kishi virusga chalinishi oqibatida vafot etgan.
• Xalqaro valuta fondi koronavirusdan jiddiy zarar ko‘rgan davlatlar uchun 50 milliard dollar miqdoridagi mablag‘ni yordam sifatida ajratadi, tashkilot 2020 yilda koronavirus tufayli jahon bo‘yicha iqtisodiy o‘sish ko‘rsatkichi 2019 yildagiga qaraganda 2,9 foizga past bo‘lishidan ogohlantirgan.
• Virus yana 6 mamlakatda aniqlangan: Janubiy Afrika Respublikasi, Bosniya va Gersegovina, Gibraltar, Vengriya, Sloveniya va Falastin muxtoriyati. Ayni vaqtda virus qayd etilgan mamlakatlar soni 88tani tashkil etmoqda.
• Eronda koronavirus infeksiyasi bilan og‘riganlar soni bir sutka ichida 1234 kishiga oshdi va bemorlarning umumiy soni 4747 kishini tashkil etmoqda. Qurbonlar soni ham 17 nafarga oshgan va 124 nafarga yetgan.