Алматовнинг айтишича, айрим давлатларда кузатилган қайта юқтириш ҳолатлари беморларга тўлиқ тузалмасдан уйга жавоб берилгани билан боғлиқдир.
“Жаҳон соғлиқни сақлаш ташкилотининг хабарларига кўра, коронавирус инфекциясини юқтириб, кейин соғайган одамларда касаллик қайталаниши ҳақида маълумотлар йўқ. Лекин Хитой, Жанубий Корея ва Япония мутахассислари билан олиб борган суҳбатларимиздан маълум бўлишича, улар касалликдан тузалгач, уйга жавоб берилган беморларда касаллик қайталанганини кузатишган. Бироқ Хитой, Жанубий Корея ва Япония мутахассисларининг айтишича, соғайгани айтилган беморлар вирусдан тўлиқ холи бўлмасдан туриб уйга жавоб берилгани тан олинган. Шу сабабли Жаҳон соғлиқни сақлаш ташкилоти мутахассислари коронавирусга чалиниб тузалган беморларда касаллик қайталаниши ҳақида охирги тўхтамга келгани йўқ. Шунинг учун бу масалага изланишлар, тадқиқотлар натижасида жавоб берилиши мумкин”, дея Баҳром Алматовнинг сўзларини келтирмоқда Kun.uz мухбири.
Мутахассис касалланган беморлар билан мулоқотда бўлган фуқаролар бўйича эпидемиологик суриштирув ишлари ҳамда ҳар бир касаллик ўчоғида эпидемия чора-тадбирларини амалга ошириш бўйича ишлар куну тун давом эттирилаётгани, бу ишга жалб этилган мутасадди вазирлик ва идораларнинг вакиллари томонидан чора-тадбирлар мувофиқлаштириб борилаётгани самара бераётганини таъкидлади.
“Эпидемиология қонуниятига кўра бошқа давлатларда кузатилаётган касалланиш динамикасини кузатадиган бўлсак, вирус юқиб-тарқалиб ўсиши давом этади. Ҳар бир давлат тиббиётининг олдида турган масала –касалланишнинг олдини олиш, касалланганлар сони кескин ошишига йўл қўймаслик, касалликнинг оғир ўтишига ҳамда бунда ўлим ҳолатларининг олдини олишга қаратилган тадбирларни тизимли ўтказиш. Бу борада ҳукуматимиз томонидан амалга оширилаётган кенг кўламли чора-тадбирлар ўз самарасини бермоқда десак хато қилмаймиз. Чунки касалликнинг ўсиши асосан уюшган жамоаларда, хориждан олиб келинган фуқароларимизда қайд этиляпти. Уларни эрта аниқлаш ҳамда касалликнинг дастлабки кунларида даволаш натижасида уларнинг оғир кечиши олди олиш бўйича ижобий самараларга эришилмоқда.
Бугунги кунда барча карантин зоналаримизда аҳолининг хавфли гуруҳлари ичида лаборатория текширувларини кучайтирганмиз. Кунига саккиз мингдан ортиқ текширишлар асосида касаллик юқиши мумкин бўлган контингент ўрганиб чиқилмоқда ҳамда уларнинг ичида касалликни юқтирганлар аниқланиб, даволашга йўналтирилмоқда.
Эпидемик вазият нохуш бўлган ҳудудлардан келган беморлар билан мулоқотда бўлган жами 80 мингдан ортиқ фуқаронинг саломатлиги устидан тиббий назорат давом эттирилмоқда. Улардан 57600 нафари уй шароитида, 22800 нафари стационар шароитдаги карантин масканларида назоратга олинган. Карантин муассасаларига малакали эпидемиологлар, тиббий кўрикдан ўтказиш учун инфекционистлар, терапевтлар ҳамда дезинфекторлар жалб этилган”, дейди Баҳром Алматов.
