Журналистлар билан муроса қилишни хуш кўрмайдиган Трамп бу гал CBS News мухбири Паула Рейднинг саволига тўғридан тўғри жавоб бермай, гапни бошқа ёққа бурди – ОАВ ва демократларни айблашга ўтди.
Мухбир президентдан мамлакатни коронавирус пандемиясидан сақлаб қолиш учун қандай чоралар кўргани ҳақида сўради. «Now This» медиа компанияси тарқатган видеодан кўринишича, бу саволга Трамп томонидан аниқ жавоб бўлмаган.
«Мен ўн минглаб, балки юз минглаб одамларнинг ҳаётини сақлаб қолдим», – дейди Дональд Трамп.
– Хитойдан қатновни тўхтатгандан кейин вақтни шифохона қуришга, тест ўтказишга сарфламадингиз.
– Сиз ўзингизни жуда ёмон тутяпсиз. Мени эшитинг. Мен буларнинг барчасини ўйлаб кўрдим.
– Одамлар ўзларини хавфсиз ҳис қилиши керак. Мисли кўрилмаган инқироз юзага келяпти.
– Бутун АҚШда қандай йўл тутиш кераклигини ҳеч ким билмасди. Лекин мен буни қилдим.
– Айнан нима қилдингиз?
– Нима қилганимизни билмоқчимисиз?
– Сиз кўрсатган видеода февраль ойи учун ҳеч нарса кўрсатилмаган. Ваҳоланки, феврал ойида касалланиш ҳолатлари бор эди.
– Бутун АҚШ бўйича бирорта ҳам касалланиш қайд этилмаган ҳолатда, сиз нима қилган бўлардингиз?
– Февраль ойида касалланганлар бор эди.
– Узр, аммо сизлар бу ҳақида хабар бергансизлар. 17 январь ҳолатига кўра, касалланиш ва ўлим ҳолатлари мутлақо йўқ, деб айтгансизлар.
– Бу январь ҳолатида. Мен февраль ҳақида сўрадим.
– Мен январь ҳақида гапиряпман.
– Айнан касаллик ҳолатлари қайд этила бошлангандан кейин сиз ва сизнинг администрациянгиз нима қилганини билмоқчиман.
– Биз кўп ишлар қилдик. Биз қилинган ишлар рўйхатини берамиз.
Шундан сўнг АҚШ президенти журналистларни сохта ахборот тарқатишда айблайди.
