CNN телеканалининг Пентагонга таяниб хабар беришича, АҚШ мудофаа вазири Пит Ҳегсет Ҳасанни отувчилар гуруҳи ёрдамида қатл этишни тавсия қилган, Трамп эса бу қарорни тасдиқлаган. Мудофаа вазирлиги матбуот котиби Шон Парнеллнинг сўзларига кўра, «2009 йилда Форт-Ҳудда қуролсиз америкалик аскарларга қарата ўт очган жиҳодчининг» қатл этилиш вақти ва жойини Ҳегсет белгилайди. Парнелл шунингдек қуйидагиларни қўшимча қилди: «У 13 кишини ўлдирди ва яна 32 кишини яралади. Ниҳоят, Ҳасан учун жазо куни етиб келди».
АҚШ армияси майори ва психиатр бўлган Ҳасан 2013 йил июл ойида қасддан 13 одамни ўлдириш ва 32 та қотилликка суиқасд қилиш ҳолатлари бўйича айбдор деб топилган. У айбини тан олган ва «ҳар қандай хатолар» учун узр сўраган эди.
Ўлимга ҳукм қилинган шахс — келиб чиқиши фаластинлик бўлган АҚШ фуқароси. У ўзининг мақсади «ноқонуний урушда» иштирок этиш учун Афғонистонга жўнатилиши керак бўлган аскарлар эканини айтган эди. 2009 йилда у Форт-Ҳуд базасида тиббий кўрикдан ўтиш учун тўпланган ҳарбий хизматчиларга қарата ўт очди. Полиция билан бўлган отишмада Ҳасан жароҳат олди ва белидан пастки қисми фалажланиб қолди. Ҳозир у ногиронлар аравачасида ҳаракатланади.
Америка армиясининг отув билан қатл этилган сўнгги аскари Эдди Словик бўлган. Бу воқеа 1945 йилнинг январида Францияда юз берган, деб қайд этди CNN. Ўшанда ҳарбий трибунал уни қочқинликда айбдор деб топган. Шу билан бирга, телеканалнинг таъкидлашича, Иккинчи жаҳон уруши давридаги 50 мингга яқин америкалик қочқин ҳарбийлар ичида фақатгина Словик қатл этилган. Генерал Дуайт Эйзенхауэр Европа фронтидаги ҳал қилувчи жанглар айни қизиган паллада қочишни ўйлайдиган бошқаларга огоҳлантириш бўлиши учун ушбу ҳукмни ижро этишга буйруқ берган.
«Қочқинлар» китоби муаллифи, журналист Чарлз Гласс 2013 йилда отиб ўлдирилган оддий аскар «ёмон жангчи бўлмагани, у шунчаки қўрқиб кетгани» ва бунинг устига ҳокимиятга ўз ихтиёри билан таслим бўлганини айтган эди. Гласснинг сўзларига кўра, Словикнинг хотинига қатл ҳақида маълум қилишмаган, балки унга «эри Европада ҳалок бўлгани»ни айтишган.
1961 йилда америкалик ҳарбий хизматчи устидан ҳозирги кунга қадар сўнгги бўлиб турган қатл ижроси амалга оширилди. Жон Беннет 11 ёшли қизни зўрлагани ва ўлдиришга урингани учун осиб ўлдирилди.
Америка қонунларига мувофиқ, АҚШ ҳарбий хизматчисига чиқарилган ҳар қандай ўлим ҳукми олий жазони енгилроғига алмаштириш ҳуқуқига эга бўлган президент томонидан тасдиқланиши шарт.
