Жиноят кодексининг 169-моддаси билан қўзғатилган жиноят иши бўйича дастлабки тергов ҳаракатлари қайта тикланди
2016 йил 11 октябрга ўтар кечаси номаълум шахс Жондор туманида яшовчи М.Н.нинг яшаш уйига ғайриқонуний равишда кирган, деб ёзмоқда Бухоро вилояти ИИБ ахборот хизмати
У ётоқхонадаги шкаф ичидан 50 АҚШ доллари ва 150 000 сўм нақд пулларини ўғирлаб кетган. Тергов тезкор гуруҳи томонидан ҳодиса жойи кўздан кечирилиб, бармоқ излари ва бошқа далилий ашёлар олинган. Бироқ, ўша вақтда олиб борилган суриштирув ишлари натижа бермаган. Шунга қарамай, жиноятни фош этиш борасидаги ишлар давом эттирилган.
Билдирилишича, орадан 4 йил ўтиб ушбу шахс яна жиноятга қўл урди. Суриштирув давомида Жондор туманида яшовчи 28 ёшли гумонланувчи Х.Ё туман ИИБга келтирилиб, ундан бармоқ излари олинганда, 2016 йил 11 октябрь куни ҳодиса жойидан олинган бармоқ излари билан бир хил эканлиги аниқланган.
Ҳозирда Жиноят кодексининг 169-моддаси 2-қисми билан қўзғатилган жиноят иши бўйича дастлабки тергов ҳаракатлари қайта тикланди. Тергов давомида Х.Ё.нинг бошқа бир нечта жиноий ҳолатларга ҳам алоқадорлиги ойдинлашган.
