Италияда 10дан ортиқ давлат хизматчилари мафия билан ҳамкорликда гумонланмоқда

Қайд этилишича, 103 млн евролик кўчмас мулк ва бошқа бойликлар мусодара қилинган.

Италия молия гвардиясининг 500га яқин ходими бутун мамлакат ҳудудида "Ндрангета" мафия гуруҳига қарши кенг миқёсдаги операцияни ўтказмоқда.

АNSA агентлигининг хабар беришича, ўнлаб кишилар ҳибсга олинган, 11 нафар амалдор жиноятчилар билан алоқадорликда гумонланмоқда.

Режо-Калабрия прокуратураси олиб борган тергов ишлари давомида амалдорлар ва тадбиркорларнинг мафия билан алоқалари аниқланди.

Агентликнинг аниқлик киритишича, 11 нафар давлат хизматчиси устидан иш очилган. Жумладан, пудрат ишларининг мафия фойдасига тақсимланиши бўйича схема фош қилинган. Қайд этилишича, 103 млн евролик кўчмас мулк ва бошқа бойликлар мусодара қилинган.

"Ндрангета" Италиядаги энг катта таъсирга эга яширин ташкилотлардан бири ҳисобланади. Бир неча йил аввал у мамлакатнинг турли ҳудудлари ҳамда Европанинг бошқа давлатларига ўрнашиб олгани ва ноқонуний фаолият орқали топилган даромадларини қонуний бизнес орқали ўзлаштиргани аниқланганди.