«Биз ҳам шу юрт келажагимиз» – Россиядан видеомурожаат йўллаган талабалар чартер рейс орқали ватанга қайтарилди

15 июль куни Россия Федерациясининг Cибир федерал округи олий ўқув юртларида таҳсил олаётган ўзбекистонлик талаба-ёшлар ўзларини қийнаётган муаммо ҳал этилишида ёрдам сўрашган эди.

Мурожаатда 100дан зиёд талаба Ўзбекистонга қайтиш учун чартер рейсга чипта харид қилишгани, аммо навбат етиб келмаётгани, маблағдан қийналиб қолишганини маълум қилишганди. Улар орасида Россияда ўқишни тамомлаб, рўйхат қайдномаси тугаётганлар ҳам бор эди. Ушбу мурожаат 15 июль куни Kun.uz сайтининг телеграмдаги канали орқали ёритилди.

Мурожаат инобатга олинди – президент Шавкат Мирзиёевнинг топшириғига биноан Новосибирск шаҳрида таҳсил олаётган талабалар 22 июль кунига ўтар кечаси, тунги соат 01.00да чартер рейс орқали Ўзбекистонга олиб келинди.

Тошкент халқаро аэропортидан репортаж тайёрлаган Kun.uz мухбири хабар беришича, чартер рейсда 200 нафарга яқин талаба олиб келинган.

Зарина Ваҳобова, Сибир давлат тиббиёт университети стоматология йўналиши талабаси:

– Бундай тезкор ҳаракат қилинишини кутмагандик. Видео пайшанба куни тарқатилди, бугун эса биз ватанимиздамиз. Мурожаатимизга бунчалик тез жавоб бўлади, деб ўйламагандим.

Ҳукумат мураккаб вазиятда бизни ташлаб қўймагани учун хурсандман. Ҳар ҳолда, нима бўлганда ҳам биз шу мамлакатнинг келажагимиз.

Ҳозир фақат хурсандчилик ва бахтиёрлик қамраб олган. Ҳурматли президентимиз Шавкат Миромоновичга катта миннатдорчилик билдирмоқчиман. Бизга ёрдам берган барчага катта раҳмат.

Жамшид Мадаминов, Сибир давлат тиббиёт университети талабаси:

– Ўқиб турган жойимизда коронавирус билан боғлиқ равишда муҳит оғирлашгани боис Ўзбекистонга қайтишга мажбур бўлдик. Талаба ёшлар бўлганимиз, чартер рейс орқали биринчи навбатда олиб келинадиганлар гуруҳига кирмаганимиз туфайли бизни олиб кетишга рози бўлишмади. Петиция йиғиб, қўл қўйганимиздан кейингина бизни тинглашди.

Иброҳимбек Маҳмудов, Сибир давлат тиббиёт университети фармацевтика йўналиши талабаси:

– Мурожаатимиз бунчалик тез ҳал қилинади, бир ҳафтада рейс ташкиллаштириб беришади, деб ўйламагандик. Август ойининг бошларида қайтишга умид боғлаган эдик.

РАНХиГС Сибир бошқарув институти 1-босқич битирувчиси:

– Қайтганимиздан жуда ҳам хурсандман. Қайд этишим керакки, сизда (Kun.uz'да) пост чиққандан кейин биз қайтишга муваффақ бўлдик.

Эндиликда талабалар карантин муддатини ўташ учун махсус кузатув остида Тошкент вилоятидаги Ўртасарой карантин марказига юборилди.

Эслатиб ўтамиз, 8 июль куни ўтказилган видеоселектор йиғилишида Президент Шавкат Мирзиёев «яна бир марта халқимизга мурожаат қилиб айтмоқчиманки, чет элдаги қолган фуқароларимизни, албатта, олиб келамиз», деб айтганди.

14 июль кунги йиғилишда Россия-Қозоғистон чегарасида қолиб кетган фуқаролар олиб келиниши чоралари кўрилаётгани маълум қилинди, 15 июль куни учта поезд орқали 2 мингдан ортиқ ўзбекистонлик ватанга қайтарилди.