Фарғонада Россия армиясига ёлланган эркак жиноий жазога тортилди. Kun.uz суд ҳужжати билан танишди.
1,5 йил қамоқ ва алдов
Суд ҳукмига кўра, 29 ёшли З.Т. 2019 йилдан бошлаб мавсумий равишда Россияга қатнаб, ишлаб юрган. 2023 йил баҳорида қўшнисининг таклифи билан Москва шаҳрига борган ҳамда етказиб берувчи бўлиб ишлаган. 2024 йил июн ойида ҳужжатсиз транспорт воситасини бошқаргани учун судланиб, 1,5 йилга озодликдан маҳрум қилинган.
Жазони ўташ даврида Украинанинг Россия томонидан босиб олинган ҳудудларида қурилиш ишларида ишлаш таклифи берилган. Бунинг эвазига жазо қўлламаслик ваъда қилинган.
З.Т. таклифга кўнган. Аммо у қурилишга эмас, фронтга олиб кетилган.
Босиб олинган мина
З.Т. судда алдаб шартнома имзолатишганини айтган.
“500 нафарга яқин мигрантни Курск вилоятининг Суджа шаҳри яқинига олиб кетишди. У ерда бизни қурилиш эмас, Россия-Украина ўртасидаги урушда қатнашиш учун шартнома имзолатишди”, деган у.
Шундан сўнг З.Т. “Питон” шартли лақаби остида жангларда қатнашган. У жароҳатланган ва вафот этган аскарларни жанг майдонидан олиб чиқувчи гуруҳда оддий аскар бўлиб хизмат қилган.
“2024 йил 25 декабр куни 4 нафар шеригим билан жароҳатланган аскарларни жанг майдонидан олиб чиқиш вақтида эҳтиётсизлик қилиб, ерга кўмилган минани босиб олдим. Мина портлаб, ўнг оёғим бармоқлари узилиб кетди”, деган З.Т.
Сўнгра уни ҳарбий госпиталга жўнатишган. У ерда 7 ой мобайнида даволанган. Бу вақтда З.Т.га Россия фуқаролигини беришган, медал билан тақдирлашган, протез оёқ тақдим қилишган.
Уйга қайтиш ва жазо
З.Т. 2026 йил апрел ойида Ўзбекистоннинг Москва шаҳридаги элчихонасига бориб, фуқаролик паспортини йўқотиб қўйганини айтган. Сўнгра 30 апрел куни ватанга қайтиш гувоҳномаси билан Ўзбекистонга қайтиб келган.
ЖИБ Қувасой шаҳар судининг ҳукми билан З.Т. Жиноят кодексининг 154-моддаси (ёлланиш) 1-қисмида назарда тутилган жиноятни содир қилишда айбли деб топилган. Унга Жиноят кодексининг 57-моддасини қўллаган ҳолда 4 йил муддатга озодликни чеклаш жазоси тайинланган.
