Алишер Усмонов рус клубига ҳомийлик қила бошлади

Россиялик йирик тадбиркор Алишер Усмонов мамлакатнинг энг совриндор жамоаларидан бири ЦСКАга ҳомийлик қила бошлади. Бу ҳақда Россиянинг «Чемпионат» нашрида эълон қилинган хабарда ёзилган.

Унда айтилишича, ЦСКАнинг титул ҳомийсига айланган «ИКС Холдинг» компанияси Антон Черепенниковга тегишли ва у 2020 йил йил апрель ойида ўз компанияси тўлиқ Алишер Усмоновга тегишли «USM Holding» ихтиёрига ўтиши борасида келишувга эришган. Черепенников эвазига Усмоновга тегишли «ЮэСэМ Телеком» компаниясининг 10 фоиз акцияларига эга бўлади.

Хабарда Усмонов ва ЦСКА хўжайини Евгений Гиннер ўртасидаги муносабатлар яхши экани айтилган. Маълум бўлишича, «армиячилар»нинг ортда қолган мавсумдаги етакчиси бўлган Николо Влашич «Эвертон»дан ЦСКАга ўтиши айнан Усмоновнинг кўмагида амалга оширилган. Чунки «Эвертон» хорватиялик футболчини сотишни истамаган. Хабарда «Эвертон» амалда Усмонов бошқарувидаги жамоа экани айтилган.

Маълумот учун, «Спартак» билан шартнома имзолашга яқин бўлган ўзбекистонлик Остон Ўруновга ЦСКА ҳам қизиқиш билдирган ва «армиячилар» «Спартак» каби Ўрунов учун 2 миллион евро беришга рози бўлган. Лекин Остон Ўрунов «Спартак» сафида тиббий кўрикдан ўтиб бўлди ва унинг трансфери шу кунларда эълон қилиниши кутилмоқда.